Statistika agentligi ma’lumotlariga ko‘ra, O‘zbekistonga 2022-yilda 5,2 million nafar chet el fuqarolari turistik maqsadlarda tashrif buyurgan. Xo‘sh, ular ko‘rsatilgan xizmatlardan rozi bo‘ldimi, o‘zi mamlakatda xizmat ko‘rsatish sifati qay darajada? “Daryo” muxbiri shu va shu kabi boshqa savollar bilan Toshkentga kelgan xorijiy sayyohlar bilan suhbatlashdi.
Angliyaning London shahridan kelganini aytgan turistning aytishicha, O‘zbekistonga kelishidan avval asosan bu yerdagi imoratlar haqida ma’lumotga ega bo‘lgan. U mamlakatga kelgach qanday taassurotlar olgani haqidagi savolga quyidagicha javob berdi:
“Hali to‘liq fikr bildira olmayman, chunki bu endi birinchi kunimiz. Turmush o‘rtog‘im mamlakatingiz haqida juda ko‘p izlanishlar olib borgan. Bino va imoratlaringiz haqida katta tasavvurga ega edim. Bu yerga kelib bildimki, taomlaringiz ham juda ajoyib ekan”, — dedi sayyoh.
Turistning aytishicha, O‘zbekiston xorijliklar uchun qulay shahar bo‘lish yo‘lida hech narsani o‘zgartirmasligi kerak.
“Hozirgidek bo‘lib qolinglar. Zamonaviylashib ham, tezlashib ham ketmanglar. Xuddi ayni damdagidek yaxshi va mehmondo‘st, ajoyib binolarga ega mamlakat bo‘lib qolishinglarni istardim”, — deya fikr bildirdi u.
Avstraliyalik turist avval O‘zbekistonni unchalik rivojlanmagan davlat deb o‘ylaganini, lekin kelgach, tasavvurlari o‘zgarganini bildirdi.
“Men Avstraliyadanman, O‘zbekistonga birinchi bor kelishim. Bugun Toshkentga kelib qoldik. O‘zbekistonga kelishingizdan avval nimalarni kutgandingiz-u, bu yerga kelgach nimalar noto‘g‘ri bo‘lib chiqdi? Unchalik rivojlanmagan davlat deb o‘ylagandim, lekin kelib ko‘rib bildimki, Toshkent juda ham zamonaviy, toza shahar ekan. Juda-juda chiroyli mamlakat. Arxitekturasi go‘zal”, — dedi sayyoh.
O‘zbekistonning deyarli barcha hududlarini aylanib chiqishga ulgurgan, uch haftadan beri mamlakatda bo‘lib turgan fransiyalik juftlikning aytishicha, Toshkentda sayohat qilish qiyin.
“Biz ko‘rkam, qadimiy inshoot va monumentlarni ko‘rmoqchi edik. Va maqsadimizga erishdik, juda ham rohatlandik. O‘zbekistonning har go‘shasini borib ko‘rdik. Ajoyib sayohat bo‘ldi. Biroq Toshkentda sayohat qilish qiyin ekan. Yo‘l ko‘rsatuvchi belgilar hamma joyda ham yo‘q, shahar esa juda katta. Insonlar qo‘ldan kelgancha yordam berdi, ammo na o‘zbek, na rus tilini bilganimiz sababli juda qiynaldik — madrasani topish uchun butun kunimizni sarfladik, hech kim to‘g‘ri yo‘l ko‘rsatolmadi, taksi haydovchilari ham”, — dedi fransiyalik sayyoh ayol.
Rossiyaning Sankt-Peterburg shahridan kelgan mehmon Toshkent juda issiq ekanini aytib, infratuzilma muammosiga ham e’tibor qaratdi.
“Balki piyodalar o‘tish joylari ko‘pdir, ammo men hali uchratmadim. Magistral yo‘l bo‘ylab ‘peshexod’lar yo‘q. Hozirgina bir bola yo‘lni yugurib kesib o‘tayotganini ko‘rdim — salbiy holat. Shahar mashinalarga mo‘ljallangandek, piyodalarga yetarli sharoitlar yaratilmagan”, — dedi u. Shuningdek, ushbu sayyoh o‘zbek palovi juda ham mazali ekanini ta’kidladi.
Suhbatning to‘liq shaklini videoformatda ko‘ring:
Izoh (0)