Surxondaryo viloyati Sariosiyo tumanida maktab direktori bir necha shaxslar tomonidan kaltaklangani aytilmoqda. Viloyat prokuraturasi mazkur xabarlarga izoh berdi.
Aniqlanishicha, 2023-yilning 6-fevral kuni Sariosiyo tumanidagi 77-maktabda o‘tkazilgan ota-onalar yig‘ilishiga borgan fuqaro M.S. maktab direktorining o‘quv-tarbiyaviy ishlar bo‘yicha o‘rinbosari X.Kenjayev bilan janjallashib qolgan. Shuningdek, u janjal vaqtida bezorilik harakatlarining oldini olmoqchi bo‘lgan maktab direktori R.Saloxiddinovni urib, unga tan jarohati yetkazgan.
Mazkur holat yuzasidan 1-mart kuni Sariosiyo tuman IIB huzuridagi tergov guruhi tomonidan fuqaro M.S.ga nisbatan Jinoyat kodeksining 277-moddasi 3-qismi “g” bandi bilan jinoyat ishi qo‘zg‘atilib, tergov harakatlari olib borilgan.
R.Salohiddinovni M.S.dan tashqari boshqa fuqarolar ham urgani holati tergov harakatlari davomida to‘plangan dalillar bilan tasdiqlanmagan. Jinoyat ishi bo‘yicha 1-aprelda fuqaro M.S.ga nisbatan Jinoyat kodeksining 277-moddasi 3-qismi “g” bandi bilan ayblov eʼlon qilinib, mazmunan qo‘rib chiqishlik uchun 4-aprelda jinoyat ishlari bo‘yicha Sariosiyo tuman sudiga yuborilgan va hozirda sud majlisida ko‘rilmoqda.
R.Saloxiddinovning 27-martda viloyat Maktabgacha va maktab taʼlimi boshqarmasi boshlig‘i nomiga o‘z xohishiga ko‘ra ishdan bo‘shatish haqidagi yozgan arizasiga asosan, u bilan tuzilgan mehnat shartnomasi 30-martdan bekor qilingan.
Avvalroq Surxondaryo viloyati Denov tumani “Dahana” mahallasida joylashgan 57-maktabning 3-sinf o‘quvchisi qotillik qurboni bo‘lgani haqida xabarlar tarqalgan edi. Viloyat prokuraturasi holat yuzasidan munosabat bildirgan.
Shuningdek, viloyatning Sariosiyo tumani xalq ta’lim bo‘limi mudiri hududdagi maktablardan birining direktorini haqorat qilgan edi.