Samarqand viloyatining Past Darg‘om tumanida mahalla raislariga bosim o‘tkazib, ularni “Mening yo‘lim” loyihasida o‘zi talab qilgan tashabbusga ovoz yig‘ishga majburlagan mansabdor ishdan olindi.
Bu haqdagi xabarni “Daryo” jurnalisti bilan suhbatlashgan Samarqand viloyati hokimligi axborot xizmati rahbari Manuchehr Mirzayev ham tasdiqladi.
Masʼulning maʼlumot berishicha, mazkur holat viloyat hokimi, viloyat prokurori va Ichki ishlar boshlig‘i ishtirok etgan yig‘ilishda muhokama qilingan.
“Biz odatda har payshanba kuni 12 ta usulda, jumladan ijtimoiy tarmoqlarda katta qiziqish bildirilayotgan maqolalar orqali olib chiqilgan murojaatlar masalasini ham tahlil qilamiz. Kecha viloyat hokimi, viloyat prokurori va Ichki ishlar boshqarmasi boshlig‘i ishtirok etgan yig‘ilishda mazkur masala ko‘rib chiqildi. Bu ishga qo‘l urgan masʼuldan nega bunday qilgani so‘raldi. U qilmishini tan oldi. Ammo niyati ko‘pchilikka xizmat qiluvchi katta chorrahani taʼmirlashga hissa qo‘shishdan iboratligini bildirdi. Lekin viloyat hokimi niyati yaxshi bo‘lsa-da, bu maqsadga kimlarnidir majburlash orqali erishish xato ekanini aytdi. Shundan so‘ng yig‘ilishda qatnashgan viloyat Kambag‘allikni qisqartirish va bandlik bosh boshqarmasi rahbarlari aholining bandligini taʼminlovchi, ularga munosib mehnat sharoiti yaratib berilishini nazorat qiluvchi tashkilot rahbarining bunday qilmishini oqlab bo‘lmasligini aytib, u bilan tuzilgan shartnomani bekor qilish kerak degan xulosaga kelishdi”, — deydi viloyat hokimligi axborot xizmati rahbari.
Avvalroq Past Darg‘om tumani hokimligida Kambag‘allikni qisqartirish va bandlik bo‘lim boshlig‘i lavozimida faoliyat yuritayotgan Tohir Qosimov Telegram messenjeridagi guruh orqali tumandagi MFY raislariga bosim o‘tkazib, ishdan bo‘shatish bilan qo‘rqitib, ularga o‘zi aytgan loyihaga ovoz berish majburiyatini qo‘ygan.
Tarmoqlarda tarqalgan skrinshotlarda mansabdor “Tezlashtiringlar, soat 12 da ovoz berish jarayoni tugaydi. Hurmatli raislar, xulosa qilinglar, xafa bo‘lmasalaringiz bo‘ldi”, — deya ularga bosim o‘tkazishga uringanini ko‘rish mumkin.
MFY raislarini ovoz berishga majburlagan mansabdor Sherzod ismli boshqa bir xodimiga MFY raislarini chaqirib, ularning pattasini olishi kerakligini uqtirgan.
“Daryo” mazkur holat yuzasidan Past Darg‘om tumani hokimi Vahobjon Murodqobilov bilan telefon orqali bog‘langandi. Mazkur vaziyatga izoh bergan hokim Vahobjon Murodqobilov “Bu holatdan hozir xabar topdim va o‘zim uchun dastlabki xulosani chiqardim. Ammo sizga ayni paytda biror gap aytolmayman. Lekin vaziyatni nazoratga olib, holatni batafsil o‘rganib chiqqanimdan so‘ng fikrimni bayon qilaman”, — degandi.
Izoh (0)