Rossiyaning Moskva shahridagi xostellardan birida o‘tkazilgan reydlarda 300 nafar migrant qo‘lga olindi. Bu haqda “Rosgvardiya” poytaxt bosh boshqarmasi xabar berdi.
Xostelda yashovchi 400 nafar xorijlikning migratsiya kartalari, pasportlari va ishchi patentlari tekshirilgan. Natijada 300 kishi migratsiya qonunchiligini buzganlikda aylanib, qo‘lga olingan. Ular qo‘shimcha tergov o‘tkazish uchun politsiya bo‘limiga olib ketilgan.
Iyul oyida ham Moskvada muhojirlarga qarshi reydlar bo‘lib o‘tgandi. O‘shanda shahardagi xostellar va ibodatxonalar tekshirilgan. Ushbu obyektlardagi 500 dan ortiq muhojir tekshiruv uchun politsiyaga olib ketilgan. Rossiyaga kirish va mamlakatda bo‘lish qoidalarini buzgan 30 dan ortiq kishi ma’muriy javobgarlikka tortilgan va chiqarib yuborilgan. Bundan tashqari, federal qidiruvda bo‘lgan bir nafar migrant qo‘lga olingan edi.
Moskvada 2024-yil 22-mart kuni Crocus City Hall konsert zalida sodir etilgan terakt migrantlarga nisbatan tekshiruv kuchayishiga sabab bo‘ldi. Rossiya hukumati bir necha Tojikiston fuqarolarini terakt tashkilotchilari deb atadi. Shundan so‘ng bozorlar, masjidlar, hammomlar va kafelarda muhojirlarga qarshi reydlar o‘tkazildi. Rossiya Tashqi ishlar vazirligi hammomda migrantlarni kaltaklagan xavfsizlik kuchlarini oqlab chiqdi. Vazirlikka ko‘ra, bu reydda “rejali tekshiruv” o‘tkazilgan va “qonun hujjatlariga muvofiq” harakat qilingan.
Rossiyadagi reydda o‘zbekistonliklarga jismoniy kuch ishlatilgandi
8-iyun kuni Moskvada o‘tkazilgan reydda mehnat faoliyatini olib borayotgan O‘zbekiston fuqarolariga nisbatan OMON jismoniy kuch qo‘llagandi. Muhojirlarga nisbatan shafqatsiz munosabat ortidan O‘zbekiston Tashqi ishlar vazirligi Rossiyaga nota yuborgandi. Unda holatga izoh berish, kuch ishlatar tashkilot vakillarining harakatlariga huquqiy baho berish so‘ralgan.
Shundan so‘ng Rossiya Tashqi ishlar vazirligi vakili Mariya Zaxarova nota diqqat bilan o‘rganilishini aytgandi. U o‘zbekistonlik hamkorlarning tegishli so‘rovi vakolatli organlarga yetkazilganini bildirgan. Olingan obyektiv ma’lumotlar belgilangan tartibda Toshkentga yuborilishi ta’kidlangan. Biroq rasmiy Toshkent mazkur holat yuzasidan ommaga bayonot bermagan.
Izoh (0)