“Barselona” klubi futbolchilarga qilingan to‘lovlar bo‘yicha qoidabuzarliklar uchun 15,7 million yevro jarimaga tortildi. Bu haqda El Confidencial nashriga tayanib, Marca xabar berdi.
Xabarga ko‘ra, Ispaniya soliq idorasi “Barselona” tomonidan sodir etilgan qoidabuzarliklar yuzasidan tekshiruvni yakunladi va klubga moliyaviy jazo qo‘lladi.
Bu qoidabuzarliklar jamoa a’zolariga Audi rusumli avtomobillar berilishi, futbolchilar uchun tashkil qilingan charter reyslar uchun to‘lov haqida ma’lumot bermagani, Arda Turan (1 312 500 yevro) va Aleksandr Song (3,5 million yevro) uchun noto‘g‘ri hisoblangan kompensatsiyalar bilan aloqador.
Surishtiruv 2019-yilda boshlangandi. Avtomobillar va charter reyslar futbolchilar uchun belgilanmagan mukofot turi ekani tekshirildi.
Avvalroq jamoa futbolchisi Serxio Buskets 15 yillik faoliyatidan keyin “Barselona”ni tark etishini e’lon qilgani haqida xabar berilgan.
Izoh (0)