Toshkent mezbonligida o‘tayotgan boks bo‘yicha Jahon chempionatining chorak final bahslari yakunlandi. Bu bosqichda ringga ko‘tarilgan 11 nafar o‘zbekistonlik bokschining 9 nafari g‘alaba qozondi va yarim finalga yo‘l oldi.
Jahon chempionatining yarim final janglari 12-may kuni bo‘lib o‘tadi. Quyida o‘zbekistonlik jangchilarning raqiblari keltirilgan.
- -51 kg: Hasanboy Do‘stmatov – Molina Salvador (Ispaniya);
- -54 kg: Oybek Jo’rayev – Dmitriy Dvali (Rossiya);
- -57 kg: Abdumalik Halokov – Munarbek Seyitbek Uulu (Qirg‘iziston);
- -63,5 kg: Ruslan Abdullayev – Hovhannes Bachkov (Armaniston);
- -67 kg: A’loxon Mo‘ydinxo‘jayev – Battumur Misheelt (Mo‘g‘uliston);
- -71 kg: Saidjamshid Ja’farov – Vanderson De-Oliveyra (Braziliya);
- -75 kg: A’loxon Abdullayev – Vanderley Pereyra (Braziliya);
- -92 kg: Lazizbek Mullajonov – Muslim Gajimagomedov (Rossiya);
- +92 kg: Bahodir Jalolov – Gadfa Drissi (Ispaniya).
O‘zbekistonlik bokschilarning 9 nafari yarim finalga yetib keldi va bu eng yaxshi natija hisoblanadi. Bu bosqichda Kuba va Rossiyadan 6 nafardan, Qozog‘istondan 5 nafar, Fransiya, Gruziya, Ispaniya hamda Hindistondan 3 nafardan bokschi ringga ko‘tariladi. Armaniston, Ozarbayjon, Braziliya, Mo‘g‘ulistondan ikki nafardan, Xitoy, Italiya, Iordaniya, Qirg‘iziston, Meksika va Tojikistondan bir nafardan jangchi final yo‘llanmasi uchun kurashadi.
Bungacha -80 kg vaznda ishtirok etgan Jasurbek Yo‘ldoshev musobaqadagi ikkinchi jangida Iordaniya vakili Huseyn Iashishga, -48 kg vazn toifasida jang qilgan Shodiyor Meliqo‘ziyev esa qozog‘istonlik Sanjar Tashkenbayga yutqazib qo‘ygandi.
Shuningdek, -86 kg vaznda O‘zbekiston sharafini himoya qilgan Shohjahon Abdullayev chorak finalda amaldagi chempion Alfonso Domingezga (Ozarbayjon), -60 kg vaznda ringga ko‘tarilgan Mujibillo Tursunov esa rossiyalik Vsevolod Shumkovga yutqazib, musobaqadagi yurishini to‘xtatgandi.
Izoh (0)