Fransiya kompaniyasi Chimyonda umummavsumiy dam olish maskanini qurishi xabar qilingan edi. Ma’daniyat va turizm vazirligi kompaniya ushbu xalqaro kurortini qurishni boshlashga tayyorligini ma’lum qildi.
“Bildirsoy—Chimyon—Nanay” xalqaro mavsumiy kurortini qurish va ekspluatatsiya qilish loyiha idorasi” davlat unitar korxonasi tomonidan “Chimyon turistik zonasini qurish” loyihasi doirasida e’lon qilingan tenderda Fransiyaning Montagne et Neige Développement (MND) kompaniyasi g‘olib deb topilgan edi.
Shu munosabat bilan, O‘zbekiston va Fransiya o‘rtasidagi Savdo-iqtisodiy hamkorlik bo‘yicha hukumatlararo komissiyasining 9-yig‘ilishi doirasida “Chimyon” xalqaro umummavsumiy kurort obyektlarini qurish bo‘yicha “Bildirsoy—Chimyon—Nanay” xalqaro umummavsumiy kurortini qurish va ekspluatatsiya qilish bo‘yicha loyiha ofisi hamda Fransiyaning Montagne et Neige Développement kompaniyasi o‘rtasida shartnoma imzolandi.
Ta’kidlanishicha, mazkur loyihani amalga oshirish natijasida O‘zbekiston aholisiga ham, xorijlik mehmonlarga ham ochiq havoda hordiq chiqarishning har xil turlarini taklif etadigan xalqaro darajadagi umummavsumiy majmua tashkil etiladi.
Loyiha doirasida dam oluvchilarni 2515 metr balandlikka ko‘tariladigan gondol tipidagi 10 kishilik oraliq osma yo‘li (maksimal quvvati — 2000 kishi/soat) va 3309 metr balandlikka chiqadigan mayatnik tipidagi 80 kishilik asosiy osma yo‘li (maksimal sig‘imi — 800 kishi/soat) quriladi. Kurort bunday inshootlarga ega bo‘lgan Markaziy Osiyo mamlakatlaridagi eng baland nuqtaga aylanadi.
Shuningdek, unda XXL Zip line, Alpine coaster, Adventure tower, Tubing, Via ferrata kabi 20 dan ortiq turdagi qishki va yozgi attraksionlar tashkil etiladi, umumiy uzunligi 20 kilometrdan ortiq bo‘lgan turli darajadagi 11 ta chang‘i uchish joylari, 6000 nafar turistga mo‘ljallangan mehmonxona majmualari va kottejlar quriladi.
Ushbu yirik tashabbusdan ko‘zlangan maqsad xalqaro miqyosdagi umummavsumiy kurort, sayyohlik joylari va turli ko‘ngilochar attraksionlar hamda osma yollarga ega yangi turistik majmualarni qurish orqali hududning investitsiyaviy jozibadorligini yuksaltirish, Toshkent viloyatining turizm infratuzilmasini rivojlantirish, mamlakatimizning tog‘li hududlarida ommaviy sportni rag‘batlantirish uchun shart-sharoitlar yaratish va yangi ish o‘rinlari tashkil qilishdir.
Natijada yiliga 3,1 million kishiga xizmat qiladigan xalqaro umummavsumiy kurort tashkil etiladi hamda 451 ta yangi ish o‘rinlari yaratiladi.
MND — tog‘li hududlarda loyihalarni amalga oshirish bo‘yicha yetakchi sanoat guruhlaridan biri bo‘lib, bosh qarorgohi Fransiya janubidagi Savoya departamentining Sen-Helene-dyu-Lak shahrida joylashgan. Guruh 2004-yildan buyon dunyoning 49 davlatida faoliyat yuritib kelmoqda. MND tog‘li joylarda turizm sohasida umummavsumiy loyihalarni amalga oshirish hamda osma yo‘llardan shaharlarda, sanoat obyektlarida va maishiy maqsadlarda foydalanish bo‘yicha keng ko‘lamli xizmatlar ko‘rsatishda jahon yetakchilaridan biri hisoblanadi.
Izoh (0)