O‘zbekiston xalq artisti Gulsanam Mamazoitova 6-maydan 8-mayga qadar poytaxtdagi Xalqaro forumlar saroyida “Kel, ey afzunginam” nomli konsert dasturini muxlislariga taqdim etadi. “Daryo” muxbirlari konsert dasturidan reportaj tayyorladi.
Xonanda o‘z konsert dasturini boshqa hamkasblaridan farqli ravishda “Xalqlar do‘stligi” san’at saroyida emas, Xalqaro forumlar saroyida o‘tkazishni ma’qul ko‘rdi. Konsert dasturi uchta blokdan iborat. Gulsanam Mamazoitova jonli ijrodagi konsert dasturi davomida ijodidagi xit darajasiga chiqib, muxlislar qalbidan joy olgan taronalarni ijro etdi.
.jpg)
Konsert dasturida xonandaning akasi Otabek Muhammadzohid ham ishtirok etib, o‘z ijodidagi taronalarni kuyladi.
“Singlim bilan duet kuylash rejada yo‘q edi, chunki bu Gulsanamning yakkaxon konsert dasturi. Keyin singlim ham, rejissor ham shu yerdasiz, chiqmasangiz bo‘lmaydi, dedilar. Shu kungacha konsert dasturlarida yordam berib kelardim. Gulsanamni yillar tarbiyaladi, tajriba bor. Dastur chiroyli, tekshirish chog‘ida ko‘nglim to‘ldi”, — deydi Otabek Muhammadzohid.
Gulsanam Mamazoitovaning konsert dasturiga qiziqchi, instabloger Elmurod Haqnazarov boshlovchilik qildi va o‘zining hazillari bilan kelgan muxlislarga kulgi ulashdi.
“Gulsanam opa menga begona emas, o‘zaro suhbatda ularga ustoz deb murojaat qilaman. Uylariga ham bemalol kirib boraman, meni ham ukasidek qabul qilgan. Yoshligimdan ularga muxlis bo‘lganman. Bitta narsani bilaman — men yaxshi ko‘rgan ayol xonandalarning ichida eng zo‘ri. Konsertga o‘zlari taklif qildi, ularning Farg‘onadagi konsertiga boshlovchilik qilgandim. Shundan keyin kelib, Toshkentdagi konsertimga ham boshlovchilik qilasiz, dedilar. Yana bitta orzum bor, Otabek Muhammadzohidning Toshkentdagi konsert dasturiga boshlovchilik qilish”, — deydi Elmurod Haqnazarov.
“Bu hurmatlariga o‘z-o‘zicha erishilmagan. Bunga ustozimning mehnatkashligi, halolligi, to‘g‘riso‘zligi, ijodga, hayotga bo‘lgan, o‘zbek ayolining zimmasiga olinishi kerak bo‘lgan mas’uliyati sabab bo‘lgan. Ko‘rib havas qilyapman, ustozim bilan faxrlanaman. Ustozimga loyiq bo‘lishga, ularning yuzini yerga qaratmaslikka harakat qilaman”, — deydi Gulsanam Mamazoitovaning shogirdi, xonanda Malika Egamberdiyeva.
.jpg)
“Har doim ‘Xalqlar do‘stligi’ san’at saroyida konsert berganman, lekin xalqimiz faqat siyosiy tadbirlarda shunday chiroyli saroyni ko‘rishlarini istamadim. Konsertim bahona mana shunday go‘zallikni ko‘rishlarini, me’morlarning ishidan bahramand bo‘lishlarini istadim. Asosiysi, bu yerda jonli ijroda kuylash uchun imkoniyatlar ko‘p. Shuning uchun men shu yerni tanladim.
Instagram’imni yurgizadigan inson olmaganman, qanaqa savollar bo‘lsa, o‘zim javob beraman, sababi xalqni aldashni yomon ko‘raman. Vaqtim bo‘lganda albatta ijtimoiy tarmoqlarga rasmimni, yangiliklarni joylayman.
San’at olamida do‘stim ko‘p, konsert dasturimda ham hammasi kelib, olqishlab turdi. To‘qson foiz san’at ahli bilan yaqinman, ilohim, yaqinligimizga ko‘z tegmasin.
Dizaynerim Akbarshoh, u bilan ancha yillardan buyon birga ishlaymiz. Asosan liboslarimga o‘zim e’tibor beraman, uning maslahatlarini ham inobatga olaman. Maslahatlashib, chiroyli, qulay liboslarni yaratamiz.
Hamma hamkasblarimning ijodini kuzatib boraman. Konsert dasturimdagi repertuarni tuzishda akamdan, onamdan maslahat olaman, ikkalamizning ham ustozimiz onam”, — deydi xonanda.
Konsertdan batafsil reportajni quyida tomosha qilishingiz mumkin.
Izoh (0)