Kamilla Parker-Boulz olijanob zodagonlar oilasida voyaga yetgan. Uning otasi Britaniya armiyasida mayor bo‘lgan, gersoginyaning qarindoshlari orasida hurmatli lordlar ham, rassomlar ham bor. Shunga qaramay Kamillaning kelib chiqishi qirolicha Yelizaveta II ga mutlaqo yoqmagan, shuning uchun shahzoda Charlzga u bilan turmush qurishga ruxsat berilmagan.
70-yillarning boshlarida Kamilla va Charlz allaqachon yaqin munosabatlar bilan bog‘langan edi. Charlz Kamillani aqldan ozar darajada sevgan, ammo onasiga qarshi turolmagan. Rad etilgan kelin qayg‘uga botmadi: 1973-yilda bo‘lajak gersoginya Endryu Parker-Boulzga turmushga chiqdi. Bu orada Kamilla shahzodaga qasdma-qasdiga bu nikohga rozi bo‘lgani haqida mish-mishlar tarqaldi.
Shu bilan sevgi hikoyasi tugaganga o‘xshardi: Kamilla ikki farzandli bo‘ladi, Charlz malika Dianaga uylanadi. Biroq bunday kuchli his-tuyg‘ular kamdan kam hollarda unutiladi. 80-yillarda Charlz va Kamilla yashirincha uchrashishni boshladi. Insayderlarning so‘zlariga ko‘ra, bo‘lajak qirol doimiy ravishda Kamillaga qo‘ng‘iroq qilib, usiz yashay olmasligini aytgan.
Putur yetgan obro‘
Ertami-kechmi Diana bu haqda bilib qolishi aniq edi. Malika Diana erining ko‘p yillik xiyonatiga amin bo‘lgach, chuqur depressiyaga tushib qoladi. Diananing bu boradagi intervyusi esa hech kimni befarq qoldirmadi, intervyuda oilasining buzilishiga sababchi bo‘lgan Charlz va uning o‘rtasidagi uchinchi shaxs haqida gapiradi. Bu gaplar Kamillaning obro‘siga birinchi zarba bo‘ldi.
1997-yilda Diana kutilmaganda vafot etganida Parker-Boulzga malomat toshlar yog‘ildi. Qalblar malikasining fojiali taqdiri butun dunyo bo‘ylab millionlab odamlarni hayratda qoldirdi. Sodir bo‘lgan voqeada yuraklari ezilgan muxlislar qirolichani, Charlz yoki Diananing o‘zini emas, balki Kamilla Parker-Boulzni ayblaydilar.
Paparatsilar uni hamma joyda kuzatishar, jurnalistlar kechasi bilan Kamillaning uyi yonida poylashardi. Bu vaqtga kelib, ayol eridan ajrashgandi, ammo aniq sabablarga ko‘ra u Charlz bilan uchrasha olmasdi. Natijada u yolg‘iz o‘zi bu tahqirlarga dosh berishga majbur bo‘ladi.
Qirol oilasining muxlislari Qirollik oilasi Kamilladan nafratlanishlariga amin edilar. Ammo malika Diananing bolalari bir necha bor o‘gay onasini himoya qilib, uni mehribon va ajoyib inson deb atashdi.
“To‘g‘risini aytsam, Uilyam va men u bilan doim juda yaxshi, yaqin munosabatda bo‘lganmiz. U yomon o‘gay ona emas. Menga ham, Uilyamga ham achinishingiz shart emas, yaxshisi, unga mehr ko‘rsating. U ajoyib ayol va otamni ko‘nglini topa oladi — biz uchun eng muhimi shu. Uilyam va men uni tasavvur qilganingizdan ham ko‘proq yaxshi ko‘ramiz”, — deydi shahzoda Garri intervyusida.
Oilaga qabul qilish
Aytgancha, Uilyam ham, Garri ham 2005-yilda Charlz va Kamillaning to‘yida ishtirok etgan. Ammo qirolicha tadbirda qatnashmaydi. Aytgancha, Yelizaveta II va Parker Boulz o‘rtasidagi keskin munosabatlar haqidagi mish-mishlar qirolichaning vafotigacha tinmadi. Taxminlarga ko‘ra, malika o‘g‘lining tanlovini qabul qilmagan. Biroq davlat rahbari taxtga o‘tirganining 70 yilligiga bag‘ishlangan tantanali marosimda aytgan so‘zlari buning aksini aytdi.
“Vaqti yetib o‘g‘lim Charlz qirol bo‘lganda, umid qilamanki, siz unga va uning rafiqasi Kamillaga ham menga bergan yordamingizni ayamaysiz. Samimiy tilagim shundaki, o‘sha payt kelganda Kamilla konsort qirolicha sifatida o‘zining sodiq xizmatini davom ettiradi”, — degan qirolicha
Ularning noqonuniy o‘g‘li bo‘lganmi?
Aytgancha, merosxo‘rlar haqida: 2019-yilda bir kishi shahzoda Charlz va Kamilla Parker-Boulzning noqonuniy o‘g‘li ekanligini da’vo qilgan edi. Uning aytishicha, 1967-yilda Charlz va Kamilla janjalning oldini olish uchun uni, ya’ni Saymon Dorante-Dayni homiylik ostidagi oilaga berishgan.
“Buvim saroyda ishlagan. Men unga juda yaqin edim, u menga Kamilla va Charlzning farzandi ekanligimni ko‘p marta aytardi. U shunchaki ishora qilmasdi, to‘g‘ridan to‘g‘ri aytardi”, — dedi Saymon jurnalistlarga 18 oyligida Karen va Devid Day tomonidan asrab olinganligini ta’kidlab.
Saroyda noqonuniy merosxo‘rning paydo bo‘lishiga shubha bilan qaraldi va genetik tekshiruvdan o‘tkazish rad etildi. O‘jar Saymon qirollik juftligi shunchaki o‘z obro‘siga putur yetkazmoqchi emas, shuning uchun bunga e’tibor berishmadi, degan gap tarqatdi.
Yangi mavqe
Kamilla muntazam ravishda ijtimoiy tadbirlarda qatnashadi va bir nechta xayriya jamg‘armalarining ishlarini boshqaradi. Vaqt o‘tishi bilan jamiyatda gersoginyaga bo‘lgan munosabat yaxshilandi: endi hatto Diananing muxlislari ham Kamilla sevgisi uchun nohaq ayblanganini tushunishdi.
Garchi qirolning turmush o‘rtog‘i unvoni Kamillaga yangi rasmiy vazifalar yuklamasa ham, u norasmiy burchini bajarishi kerak: hukmronligi davrida erini qo‘llab-quvvatlash. Shunday qilib, faol ijtimoiy faoliyati bilan tanilgan shahzoda Filipp va shahzoda Albert bu yukni a’lo darajada uddalashdi.
6-may kuni Charlz III ning rafiqasiga ham yangi monarxning taxtga o‘tirgani munosabati bilan toj kiydirildi. Ehtimol, shu bilan Kamilla va Diananing dushmanlik munosabati haqidagi gaplar ortda qolar.
Izoh (0)