“Bu kunni 15 yil kutdim”. 45 yoshli xonanda Samandar Hamroqulov ilk marta ota bo‘ldi (video)

O‘zbekistonda xizmat ko‘rsatgan artist Samandar Hamroqulov 15 yil deganda ilk marta ota bo‘ldi. Bu haqda u “Shok.uz” YouTube kanaliga bergan intervyusida so‘zlab berdi. 




“Alloh Taolo bizga qiz farzand berdi. Ismlarini Maryam deb qo‘ydik. Maryam qizimiz 34 kunlik bo‘ldilar. Alhamdulillah, Alloh sabr qilgan odamning duosini ijobatsiz qoldirmas ekan. Inson sabrli bo‘lishi kerak ekan. Hamma yaxshiliklar sabr qilgan insonga berilar ekan. Bu yangilikni hech qayerda ovoza qilishni istamadim. Ko‘z, nazar degan narsa bor. 15 yil avval farzand bo‘lib, oxirigacha rivojlanmay nobud bo‘lib qolgan paytda ham ichimdan ‘ertaroq xursand bo‘lib qo‘ydimmikan’, degan o‘y o‘tgan. ‘Yangilik bormi?’, deb so‘ragan tanishlarga xursand bo‘lib, ‘Ha, mana buncha haftalik bo‘ldi, bunchalik bo‘ldi’, deb aytganman. Shuning uchun ko‘z tegdimikan, deb o‘ylab qolganman. Shu sababli bu safar farzandli bo‘lish xabarini eshitganimda, hech kimga aytishni istamadim”, — deydi xonanda. 

Xonanda ikki yil avval bergan intervyularidan birida farzand asrab olish niyati borligini ham aytib o‘tgan edi. 

“Farzand asrab olish haqida har doim o‘ylaymiz. Haligacha bor bu fikr. Lekin uning ham o‘ziga yarasha qonun-qoidalari bor ekan. Asrab olgan farzandingiz o‘g‘il, o‘zingizniki qiz bo‘lsa, deylik, ular boshqa-boshqa xonalarda uxlashi kerak ekan. Chunki asrab olgan farzandingiz o‘zingiznikiga nomahram hisoblanar ekan. Bu haqda shayx hazaratlarining kitoblarida keltirilgan”, — degan edi xonanda.

Shuningdek, u jurnalistning “14 yil davomida ayolingiz bilan ajrashish yoki yana bir boshqa ayolga uylanish fikri kelmaganmi?”, degan savoliga ham javob bergan.

“Bir inson qanday qilib ikki kishini yaxshi ko‘rishi mumkin? Men mehrimni ikkiga bo‘la olmayman, ayolimni yaxshi ko‘raman. Ikkinchi ayolga uylanganida nafaqat uni moddiy tomondan ta’minlash kerak, balki unga ham mehr berish kerak. Adolatni ta’minlash qiyin bo‘ladi. Men ikki ayolni birdek yaxshi ko‘ra olmayman”, — degan edi Samandar Hamroqulov.