“O‘zbekiston temir yo‘llari” AJ yo‘lovchilarni temiryo‘l chiptalari bilan bog‘liq firibgarlik holatlari aniqlanayotganini ma’lum qildi.
Qayd etilishicha, so‘nggi vaqtlarda “O‘ztemiryo‘lyo‘lovchi” aksiyadorlik jamiyati tomonidan chiptalarni rasmiylashtirish bilan bog‘liq bir nechta firibgarlik holati aniqlangan. Ulardan biri 4-may kuni 766-sonli yuqori tezlikda harakatlanuvchi “Afrosiyob” elektropoyezdining Toshkent—Samarqand—Buxoro yo‘nalishida harakatlangan yo‘lovchi poyezdda sodir bo‘lgan. Yaʼni chiptaga elektron tarzda boshqa shaxslarning maʼlumotlari kiritilgan holda qalbakilashtirilib, bir nechta fuqaro harakatlanayotgani ma’lum bo‘lgan.
Mazkur holatda yo‘lovchi poyezdlarda xizmat tekshiruvlarini o‘tkazishda tegishli mutaxassislar jalb qilinib, yo‘lovchi poyezdlarda firibgarlik yo‘li bilan harakatlanadigan yo‘lovchilarga qonunda belgilangan choralar ko‘riladi.
“Temiryo‘l transporti uchun chiptalarni faqat temiryo‘l chiptaxonalarida yoki ‘Chipta.railway.uz’ rasmiy sayti orqali onlayn xarid qilishingiz mumkin. Elektron chiptalarni xarid qilishda, shaxsiy va uyali aloqa maʼlumotlaringiz to‘g‘ri va aniq ekanligiga ishonch hosil qiling”, — deyiladi xabarda.
Bundan oldin, Toshkentda xaridor qalbaki pulga iPhone sotib olgani aniqlangani, ISHIDga aloqador O‘zbekiston fuqarolariga soxta Qirg‘iziston pasporti tayyorlamoqchi bo‘lgan ayol ushlangani, Toshkentda besh nafar fuqaroga “prava” olishi uchun soxta sertifikat yasab bergan avtomaktab o‘qituvchisi jinoiy javobgarlikka tortilgani to‘g‘risida xabar berilgandi.
Izoh (0)