Namangan viloyati Yangiqo‘rg‘on tumanida dugonasining plastik kartasidagi pullarni yechib olgan ayolga jinoyat ishi qo‘zg‘atildi. Bu haqda IIV Kiberxavfsizlik markazi xabar berdi.
Qayd etilishicha, Yangiqo‘rg‘on tumanida yashovchi fuqaro 18 yoshli X.J. ariza bilan murojaat qilib, Rossiyadan unga yuborilgan pullar nomaʼlum shaxs tomonidan yashirin tarzda yechib olinganini maʼlum qilgan.
O‘tkazilgan tezkor-qidiruv tadbirlari natijasida, ushbu jinoyatni mazkur tumanda yashovchi 23 yoshli (ayol) E.D. sodir etgani aniqlangan.
Unga ko‘ra, X.J. dugonasi E.D.ga Rossiyadan unga pul yuborilishni aytib, bank kartasidan foydalanib turishini so‘ragan. Fuqaro E.D.ning bank kartasiga yuborilgan 2 million so‘mdan ortiq pullarni dugonasi X.J.dan yashirincha ilova yordamida boshqa bank kartasiga o‘tkazib, o‘z ehtiyojlari uchun sarflab yuborgan.
Jinoyat sodir etgan E.D. Jinoyat kodeksining 169-moddasi (o‘g‘rilik) 1-qismi bilan jinoiy javobgarlikka tortilgan. Qonunchilikda bu kabi jinoiy harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
Aprel o‘rtalarida Namanganda maktab o‘quvchisi ustozining plastik kartasidan 2 million so‘m yechib olgani to‘g‘risida xabar berilgandi. 2022-yil iyulda esa Andijonda 8-sinf o‘quvchisi o‘nlab fuqarolarning pullarini qo‘lga kiritib, PUBG o‘yiniga tikib yuborgani aniqlangan edi.
Izoh (0)