Ўзбекистонда 27—28 апрель кунлари Иккинчи Тошкент Халқаро инвестиция форуми бўлиб ўтди. TXИФ-2023да дунёнинг 70 мамлакатидан 2,5 мингдан ошиқ иштирокчи қатнашди. 2022 йилги форумга 50 мамлакатдан 1,5 минг нафар меҳмон ташриф буюрган эди.
Тадбир доирасида экспертларнинг 30 дан ортиқ муҳокама учрашувлари, жумладан, давра суҳбатлари ва инвестицион музокаралар ўтказилди.
Жумладан, “Анъанавий энергия: қарашлар ва истиқболлар” давра суҳбатида “Ўзбекнефтгаз” бошқаруви раиси Баҳодир Сидиқов мамлакатга нефть ва газ бўйича инвесторларни жалб қилиш ҳақида гапириб ўтди.
Форумнинг “Банк ва молия: янги имкониятлар” мавзусидаги давра суҳбатида экспертлар банк иши доимий равишда ривожланиб бораётган соҳа эканлиги, ҳозирда Ўзбекистон бозорида кўплаб имкониятлар мавжудлигини таъкидлади.
Бундан ташқари, Халқаро Ислом савдо молия корпорацияси бош операцион директори Назим Нордали “Дарё”га Trade Connect + дастури, Ўзбекистондаги инвестицион ҳолат, мамлакат ҳақидаги таассуротлари ҳақида батафсил сўзлаб берди.
Тадбирда ўзаро ҳамкорлик, хусусан, Ўзбекистон корпорацияси ва корхоналари ўртасида савдони ривожлантириш йўналишлари муҳокама қилинди.
Trade Connect + дастури хусусий секторнинг халқаро савдо салоҳиятини очиш ва ошириш, шунингдек, Марказий Осиё минтақаси ва Озарбайжонда Ислом ҳамкорлик ташкилотига (ИҲТ) аъзо мамлакатлар ўртасидаги савдони ривожлантиришга кўмаклашишга қаратилган. Trade Connect + дастури келгуси 5 йил ичида 600 миллион доллар миқдорида маблағ ажратишни режалаштирмоқда.
Агар биринчи форум доирасида жами 7,8 млрд долларлик 105 та ҳужжат имзоланган бўлса, жорий йилда TXИФ-2023 доирасида 164 та келишув ва шартнома имзоланди, уларнинг умумий қиймати 11 млрд долларга етди.
Маълум бўлишича, эришилган келишувларни ўз вақтида ва сифатли амалга ошириш мақсадида “йўл харитаси” ишлаб чиқилди. Унда ҳар бир лойиҳанинг ижрочилари ва амалга ошириш муддатлари белгилаб қўйилди.
Изоҳ (0)