O‘zbekistonda qizamiq bilan kasallanganlar soni ortayotgani to‘g‘risida xabar tarqaldi. Sanitariya-epidemiologik osoyishtalik va jamoat salomatligi qo‘mitasi holat yuzasidan munosabat bildirdi.
Ma’lum qilinishicha, 2023-yilning o‘tgan davri mobaynida faol olib borilgan epidemiologik surishtiruvlar natijasida respublikada 37 nafar bemorlarda qizamiq kasalligi tasdiqlangan. 2022-yil yakunida dunyo bo‘yicha 155 ming holatda qizamiq kasalligi ro‘yxatga olingan.
Qizamiq kasalligi bo‘yicha murakkab epidemik vaziyatning oldini olish maqsadida O‘zbekistonda 2022-yilning 16-noyabr—30-dekabr kunlari 6 oylikdan 5 yoshgacha bo‘lgan bolalarda qizamiq-qizilchaga qarshi ommaviy emlashlar o‘tkazildi. Natijada rejadagi 3 355 900 nafar bolaning 3 303 582 nafari yoki 98,4 foizi emlash bilan qamrab olindi va hozirda ham emlash ishlari davom ettirilmoqda.
“Jahon sog‘liqni saqlash tashkilotining (JSST) qizamiq va qizilcha kasalligi bo‘yicha e’lon qilingan ma’lumotlariga ko‘ra, hozirda dunyoning 150 dan ortiq mamlakatida murakkab epidemiologik vaziyat saqlanib turibdi. Yuqoridagilardan xulosa qilib shuni aytish mumkinki, hozirda respublikamizda kasallikka qarshi barcha zarur profilaktik choralar ko‘rilmoqda, epidemik vaziyat barqaror va to‘liq nazoratga olingan”, — deyiladi xabarda.
Izoh (0)