Buxoro viloyati Peshku tumanida ingliz tili darajasini belgilovchi sertifikatni pul evaziga olib berishni va’da qilgan o‘qituvchi qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, Peshku tumanidagi 1-sonli IDUM ingliz tili fani o‘qituvchisi, tumanning “Sadir” mahallasida yashovchi 34 yoshli B.Z. boshqa bir fuqaroni aldab, unga Linguaskill sertifikati “V2” ingliz tili darajasini belgilovchi sertifikatni olib berishni vaʼda qilib, undan firibgarlik yo‘li bilan AQSH 500 dollari olgan.
Buxoro viloyati huquq-tartibot organlarining hamkorlikdagi tezkor tadbiri davomida firibgarlik yo‘li bilan olgan pullaridan 200 dollarini 24-aprel kuni turmush o‘rtog‘i M.Sh. orqali Peshku tumanining “Mustaqillik” mahallasi hududida qaytarib berayotgan vaqtida qo‘lga olingan
Mazkur holat yuzasidan Jinoyat kodeksining 168-moddasi (firibgarlik) 1-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Fevral oyida Farg‘ona viloyati O‘zbekiston tumanida xalqaro sertifikat olib berishni vaʼda qilgan shaxslar ushlangandi. Aprelda esa Jizzaxda 2,4 ming AQSH dollariga tibbiyot kolleji diplomini sotmoqchi bo‘lgan mas’ul xodim qo‘lga olingani xabar qilingandi.
Izoh (0)