Oliy ta’lim, fan va innovatsiyalar vazirligi “Oliy taʼlim muassasalari talabalarini turar-joy bilan taʼminlash tizimini takomillashtirish chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
O‘zbekiston prezidentining farmoni bilan tasdiqlangan 2022—2026-yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturida talabalarni yotoqxonaga onlayn joylashish imkoniyatlarini beruvchi, Davlat xizmatlari markazi va Yagona interaktiv davlat xizmatlari portali orqali ko‘rsatiladigan bepul elektron xizmatni joriy etish belgilangan. Bunda:
- yotoqxonalar hisobini yuritish reyestrini ishlab chiqish;
- ijtimoiy himoyaga muhtoj talabalarni ustuvor ravishda joylashtirish;
- Yagona interaktiv davlat xizmatlari portali orqali elektron ariza berish va to‘lovlarni amalga oshirish imkoniyatini yaratishni nazarda tutish belgilangan.
Hujjat loyihasiga muvofiq, 2023-yil 1-sentabrdan boshlab davlat oliy taʼlim muassasalari talabalariga ijara to‘lovining bir qismini davlat budjeti hisobidan qoplab berishning soddalashtirilgan tartibi joriy etiladi.
Bunda:
- talabgorlarga oylik ijara to‘lovining bir qismi ijara shartnomasining summasidan qatʼi nazar Toshkent shahrida – bazaviy hisoblash miqdorining bir baravari (300 ming so‘m), qolgan hududlarda – bazaviy hisoblash miqdorining yarim baravari miqdorida to‘lanadi;
- ijara shartnomasida ikki va undan ortiq talabalarni rasmiylashtirishda xonadonning maydoni har bir talaba uchun 12 metr kvadratdan kam bo‘lmasligi lozim;
- talabalar safiga qabul qilingan va talabalar turar joyi bilan qamrab olinmagan oliy taʼlim muassasasidan uzoq joylashgan hududlardan kelgan birinchi bosqich talabalari (doimiy yashash joyi boshqa tumanda (shaharda) bo‘lgan ijara asosida yashaydigan talabalar)ga, oliy taʼlim muassasalariga ushbu maqsadlarda ajratilgan mablag‘lar doirasida sentabr va oktabr oylari uchun ijara shartnomasi talab etmasdan oylik ijara to‘lovining bir qismi qoplab beriladi hamda belgilangan tartibda ijara shartnomasi taqdim etgan talabalarga noyabr oyidan to‘lovlar davom ettiriladi;
- davlat oliy taʼlim muassasalari tomonidan ijara huquqi asosida yashayotgan, biroq ijara to‘lovlari ushbu qarorda belgilangan tartibda davlat budjeti hisobidan qoplanadigan talabalarning 60 foizidan ortgan qismi uchun oylik ijara to‘lovi bir qismini ushbu oliy taʼlim muassasasi tomonidan tasdiqlangan mezonlar va tartib asosida moliyaviy imkoniyatidan kelib chiqib budjetdan tashqari mablag‘lari hisobidan qoplab berilishi mumkin.
Talabalar bilan tuziladigan turar joy ijara shartnomalarini davlat soliq xizmati organlarida soliq to‘lovchining shaxsiy kabineti orqali masofadan turib biometrik identifikatsiyalash (Face-ID) texnologiyasi orqali elektron shaklda real vaqt rejimida hisobga qo‘yishga ruxsat etiladi.
Belgilanishicha, 2023/2024-o‘quv yilidan boshlab davlat oliy taʼlim muassasalari talabalarini yotoqxonaga joylashtirish onlayn shaklda amalga oshiriladi.
Talabalarni yotoqxonaga onlayn joylashish imkoniyatlarini beruvchi Davlat xizmatlari markazi va Yagona interaktiv davlat xizmatlari portali orqali ko‘rsatiladigan bepul elektron xizmatni joriy etishning maʼmuriy reglamenti ilovaga muvofiq tasdiqlansin va 2023/2024-o‘quv yilidan boshlab amaliyotga joriy etiladi.
Bunda:
- Bilim va malakani baholash agentligi tomonidan 2023/2024-o‘quv yilidan boshlab abituriyentlar uchun Davlat oliy taʼlim muassasalariga o‘qishga hujjat topshirish jarayonida talabalar turar joyiga bo‘lgan ehtiyojni belgilash imkoniyati yaratiladi;
- 2023/2024-o‘quv yilidan boshlab talabalar yotoqxonaga joylashish uchun faqat davlat xizmatlari markazlari yoki Yagona interaktiv davlat xizmatlari portali orqali murojaat qiladi;
- Davlat xizmatlari markazlari yoki YIDXP orqali elektron ariza berish va to‘lovlarni amalga oshirishda davlat xizmatini ko‘rsatish komissiya mablag‘lari undirilmaydi.
Shavkat Mirziyoyev 2021-yilning aprel oyida ijarada yashayotgan talabalarga 1-maydan boshlab ijara to‘lovining yarmi davlat tomonidan qoplab berilishini aytgandi. Keyinchalik ijara to‘lovi xarajatlarining 50 foizi BHMning bir baravaridan oshmagan taqdirda to‘lab berilishi ma’lum bo‘lgan. Sentabr oyida talabalarga ijara to‘lovining bir qismini qoplab berish tartibi belgilangandi.
Izoh (0)