Шавкат Мирзиёев 27 апрель куни Тошкент инвестиция форуми дастури доирасида бир қатор учрашувлар ўтказди. Бу ҳақда президент матбуот хизмати хабар берди.
Дастлаб давлат раҳбари Қирғизистон президенти администрацияси раҳбари Ақилбек Жапаровни қабул қилди. Ўзбекистон–Қирғизистон кўп қиррали ҳамкорлигига оид амалий жиҳатлар муҳокама қилинди.
Икки томонлама муносабатларнинг бугунги юксак даражаси мамнуният билан қайд этилди. Жадал мулоқотлар давом эттирилмоқда, муҳим иқтисодий лойиҳалар ва гуманитар дастурлар амалга оширилмоқда.
Ҳудудлар форуми ва Авлодлар учрашувини ўтказишга пухта тайёргарлик кўрилмоқда. Президент автомобилсозлик, энергетика, транспорт инфратузилмаси, пойтахтларда савдо уйларини очиш бўйича кооперация лойиҳаларини тезлаштириш зарурлигини таъкидлади.
Шундан сўнг Шавкат Мирзиёев Бирлашган Араб Амирликлари энергетика ва инфратузилма вазири Сухайл ал-Мазруийни қабул қилди. Ўзбекистон–БАА кўп қиррали ҳамкорлиги доирасидаги лойиҳаларни илгари суриш масалалари кўриб чиқилди.
Музокаралар аввалида вазир ал-Мазруий давлат раҳбарига президент Шайх Муҳаммад Ол Наҳаён ва Висе-президент, Бош вазир, Дубай амири Шайх Муҳаммад Ол Мактумнинг саломини етказди. Икки томонлама муносабатлар ривожининг бугунги юқори суръати катта мамнуният билан қайд этилди.
Кейинги бир неча йилда товар айирбошлаш икки баробар ошди, 50 та янги корхона ташкил этилди, инвестисия лойиҳалари портфели 3 миллиард доллардан ортди. Қўшма инвестисия компанияси муваффақиятли фаолият юритмоқда.
Бўлажак олий даражадаги учрашувларга тайёргарлик кўриш ва уларни аниқ мазмун билан бойитиш мақсадида Ўзбекистон етакчиси “яшил” иқтисодиёт, энергетика, транспорт ва логистика, қишлоқ хўжалиги, инфратузилма ва бошқа устувор йўналишларда истиқболли лойиҳаларни илгари суриш муҳимлигини таъкидлади.
Президент Тошкент шаҳридаги Халқаро инвестиция форуми доирасида Венгрия иқтисодий ривожланиш вазири Мартон Надни ҳам қабул қилди. Икки мамлакат ўртасидаги савдо-иқтисодий ҳамкорликни янада ривожлантиришнинг биринчи галдаги чора-тадбирлари муҳокама қилинди. Тадбиркорлар ва ҳудудлар даражасидаги кооперасияни тубдан кенгайтиришга алоҳида эътибор қаратилди.
Яқин ойларда тўғридан-тўғри авиақатновларни йўлга қўйиш, чуқурлашган саноат кооперасияси учун мўлжалланган тузилма шартларини тез фурсатда келишиш ва фаолиятини бошлаш муҳим экани таъкидланди. Қишлоқ хўжалиги, фармасевтика, транспорт ва коммуникасиялар, самарали молиявий воситаларни яратиш борасидаги лойиҳаларни тайёрлаш ва амалга ошириш ишларини тезлаштиришга келишиб олинди.
Шавкат Мирзиёев Саудиянинг “АCWА Power” компанияси бошқаруви раиси Муҳаммад Абдулла Абунайян билан ўтказган учрашувда жорий лойиҳаларни амалга ошириш масалалари ва шерикликни тубдан кенгайтириш имкониятлари кўриб чиқилди. Давлат раҳбари Ўзбекистоннинг “яшил” энергетика тармоғи ривожига энг кўп сармоя киритаётган ушбу компания билан ҳамкорлик сермаҳсул бўлаётганини мамнуният билан қайд этди.
Бугунги кунда муқобил энергетика соҳасида 7,5 миллиард долларлик лойиҳалар амалга оширилмоқда. Бундан ташқари, қуёш ва шамол электр станцияларини қуриш, “яшил” водород ишлаб чиқариш бўйича янги лойиҳалар фаол тайёрланмоқда. Суҳбат чоғида кооперасияни янада чуқурлаштириш, биринчи навбатда инновасион лойиҳаларни, шу жумладан Ўзбекистон–Саудия Ишбилармонлар кенгаши доирасида илгари суриш истиқболлари муҳокама қилинди.
Шавкат Мирзиёев 27 апрель куни иккинчи Тошкент халқаро инвестисия форуми доирасида БМТ бош котибининг ўринбосари, Европа иқтисодий комиссияси (ЕИК) Ижрочи котиби Олга Алгаеровани қабул қилди. Учрашувда барқарор ривожланиш мақсадларига тезкор эришиш борасида БМТ институтлари, шу жумладан, ЕИК билан кўп қиррали ҳамкорликни ривожлантириш масалалари кўриб чиқилди.
Марказий Осиё минтақаси мамлакатлари учун махсус дастур доирасида самарали ҳамкорлик қилинаётгани мамнуният билан қайд этилди. Томонлар Ўзбекистоннинг Жаҳон савдо ташкилотига аъзо бўлиши ҳамда “Яшил макон” дастурини, юк ташишларни рақамлаштириш ва тўқимачилик саноати лойиҳаларини амалга ошириш масалаларида алмашинувларни давом эттиришдан манфаатдор эканини таъкидлади. Суҳбатда БМТ ЕИК билан устувор йўналишларда ҳамкорликни янада кенгайтириш масалалари ҳам муҳокама қилинди.
Изоҳ (0)