Turkiya prezidenti Rajab Toyyib Erdo‘g‘onning mahalliy telekanallarga bergan intervyusi to‘satdan uzilib qoldi, Erdo‘g‘on oshqozonidagi shamollash tufayli jonli efirda o‘zini yomon his qildi.
Suhbat 25-aprel oqshomida respublika rahbarining saylovoldi dasturi tig‘izligi tufayli kech boshlangan. Jurnalist kutilayotgan saylovlar xususan, Vazirlar Mahkamasidagi bo‘lajak o‘zgarishlar haqida savol bera boshlaganida, jonli efir to‘satdan to‘xtatildi. 20 daqiqa davom etgan pauza ijtimoiy tarmoqlarda shov-shuvga sabab bo‘ldi.
Efir qayta tiklanganidan keyin Erdo‘g‘on tomoshabinlardan uzr so‘radi va saylovoldi ishlari davomida oshqozoni shamollab qolganini aytdi.
“Avvalo, sizga sihat-salomatlik tilayman. Kecha va bugun saylovoldi ishlari qizg‘in kechdi. Shunday qilib oshqozon shamollashiga duchor bo'ldim. Intervyuni bekor qilish haqida ham o‘yladim. Lekin va’da berganimiz uchun keldim. Vaqti-vaqti bilan shunday muammolarga duch kelamiz, siz va tomoshabinlarimizdan uzr so‘rayman”, — dedi Erdo‘g‘on.
Ikkita qisqa savoldan so‘ng dastur boshlovchisi Turkiya rahbari bilan suhbat “janob prezidentga dam olishga imkon berish” uchun yakunlanayotganini aytdi.
Turkiyada prezidentlik va parlament saylovlari 14-mayga belgilangan. Amaldagi prezident Erdo‘g‘onning asosiy raqibi — muxolifatdagi “Xalq alyansi” partiyasidan yagona nomzod Kemal Qilichdoro‘g‘li bo‘lib turibdi.
Izoh (0)