Janubiy Afrika respublikasidagi (JAR) hukmron Afrika milliy kongressi partiyasi mamlakatni Xalqaro jinoiy sud (XJS) yurisdiksiyasidan chiqarishga qaror qildi. Bu haqda JAR prezidenti Siril Ramafosning bayonotiga tayanib, International Business Times xabar berdi.
Nashrning yozishicha, Janubiy Afrika respublikasi hukumatining bunday qaroriga “XJSning ayrim davlatlarga nisbatan adolatsiz munosabati” sabab bo‘lgan.
“Sudning adolatsiz munosabatda bo‘lish masalasini to‘g‘ri muhokama qilish kerak, deb hisoblaymiz, ammo hukmron partiya yana bir bor mamlakat XJS tarkibidan chiqishi kerak, degan qarorga keldi”, — deydi Ramafosa.
O‘z navbatida, “TASS” JAR prezidentining rasmiy vakiliga tayanib, mamlakatning XJSdan chiqishi bo‘yicha yakuniy qarorni milliy parlament qabul qilishi kerakligini yozadi.
Putinni hibsga olish orderi
17-mart kuni Gaagadagi Xalqaro jinoiy sud Rossiya prezidenti Vladimir Putinni hibsga olishga order berdi. U Ukrainaning bosib olingan hududlaridan bolalarni Rossiyaga noqonuniy deportatsiya qilishda gumon qilinmoqda. Xuddi shunday order Bolalar ombudsmanı Mariya Lvova-Belovaga nisbatan ham chiqarilgan.
2023-yil avgustda BRIKS sammiti JARda bo‘lib o‘tadi, unga Vladimir Putin taklif qilingan. Shu munosabat bilan mamlakat rasmiylari Rossiya bilan maslahatlashuvlar o‘tkazishga va’da bergan, chunki Xalqaro jinoiy sud yurisdiksiyasini tan olgan har qanday davlat uning qarorlarini bajarishi, jumladan, hibsga olish uchun order berilgan shaxslarni Gaagaga ekstraditsiya qilishi kerak.
2015-yilda Sudan prezidenti Umar al-Bashir Janubiy Afrikaga uchib ketgan, XJS uning hibsga olinishi uchun order bergandi. Mahalliy sud al-Bashirga ekstraditsiya masalasi ko‘rib chiqilayotgan vaqtda mamlakatni tark etishni taqiqlagan, biroq ertasi kuni Sudan prezidenti o‘z mamlakatiga qaytgan. Janubiy Afrika huquq-tartibot idoralari bunga to‘sqinlik qilmagan. Keyinroq mamlakat rasmiylari XJS tarkibidan chiqishga uringan, biroq Oliy sud keyin bu qarorni konstitutsiyaga zid deb topgan.
Izoh (0)