Туркия президенти Ражаб Тоййиб Эрдўғоннинг маҳаллий телеканалларга берган интервьюси тўсатдан узилиб қолди, Эрдўғон ошқозонидаги шамоллаш туфайли жонли эфирда ўзини ёмон ҳис қилди.
Суҳбат 25 апрель оқшомида республика раҳбарининг сайловолди дастури тиғизлиги туфайли кеч бошланган. Журналист кутилаётган сайловлар хусусан, Вазирлар Маҳкамасидаги бўлажак ўзгаришлар ҳақида савол бера бошлаганида, жонли эфир тўсатдан тўхтатилди. 20 дақиқа давом этган пауза ижтимоий тармоқларда шов-шувга сабаб бўлди.
Эфир қайта тикланганидан кейин Эрдўғон томошабинлардан узр сўради ва сайловолди ишлари давомида ошқозони шамоллаб қолганини айтди.
“Аввало, сизга сиҳат-саломатлик тилайман. Кеча ва бугун сайлов олди ишлари қизғин кечди. Шундай қилиб ошқозон шамоллашига дучор бўлдим. Интервьюни бекор қилиш ҳақида ҳам ўйладим. Лекин ваъда берганимиз учун келдим. Вақти-вақти билан шундай муаммоларга дуч келамиз, сиз ва томошабинларимиздан узр сўрайман”, — деди Эрдўғон.
Иккита қисқа саволдан сўнг дастур бошловчиси Туркия раҳбари билан суҳбат “жаноб президентга дам олишга имкон бериш” учун якунланаётганини айтди.
Туркияда президентлик ва парламент сайловлари 14 майга белгиланган. Амалдаги президент Эрдўғоннинг асосий рақиби — мухолифатдаги “Халқ алянси” партиясидан ягона номзод Кемал Қиличдорўғли бўлиб турибди.
Изоҳ (0)