Тошкентда иккинчи Инклюзив бизнес-форум бўлиб ўтади

Тошкент шаҳридаги Панарамс Tashkent меҳмонхонасида 27 апрель куни гибрид форматдаги Иккинчи Инклюзив бизнес-форум ўтказилади.

Forum Zoom ва YouTube платформасида расмий саҳифа орқали жонли трансляция қилинади. Форумнинг асосий тили ўзбек тили бўлиб, рус, инглиз ва ўзбек имо-ишора тилига синхрон таржима қилинади. Форумнинг мақсади:

•  инклюзив иш билан таъминлашнинг муваффақиятли ҳолатларини тақдим этиш орқали иш берувчиларнинг ногиронлиги бўлган аризачиларга нисбатан қарашларини ўзгартириш;
• ногиронларни иш билан таъминлашдаги муаммоли масалаларни юридик бўлим ва кадрлар бўлими билан муҳокама қилиш;
• инклюзив иш берувчилар учун давлат томонидан тақдим этилаётган субсидиялар ва имтиёзлар ҳақида хусусий секторнинг хабардорлигини ошириш;
• маҳаллий медиа платформалари орқали аҳолининг инклюзив бандлик ҳақида хабардорлигини ошириш;
• хусусий сектордаги иш берувчилар, ногиронлиги бўлган шахслар ташкилотлари билан ўтказилган муҳокамалар асосида таҳлилий эслатма ишлаб чиқилади ва Камбағалликни қисқартириш ва бандлик вазирлигига тақдим этилади.

Форумда иштирок этишга таклиф қилинади:

• Турли шаклдаги ногиронлиги бўлган шахсларни иш билан таъминлашдан манфаатдор бўлган йирик, ўрта ва кичик бизнес вакиллари;
• Меҳнат бозорида ногиронлиги сабабли дискриминацияга учраган ва айни дамда иш қидираётган ногиронлиги бор шахслар;
• Маҳаллий ва хорижий оммавий ахборот воситалари, шунингдек, инклюзив бандлик ва Ўзбекистонда ногиронлиги бўлган шахсларни иш билан таъминлаш муаммолари билан боғлиқ масалаларни ёритишни истовчи блогерлар.

Форумда иштирок этиш шартлари: Форумда иштирок этиш бепул, офлайн режимда иштирок этиш учун жойлар сони чекланган (юзтадан кўп бўлмаган). Тадбирда офлайн ва онлайн иштирок этиш учун олдиндан рўйхатдан ўтиш талаб қилинади.

Тадбир куни “Шароит плус” ҳамда форум ҳамкорларининг ижтимоий тармоқлари ва ташкилотнинг YouTube каналида жонли эфир ўтказилиши режалаштирилган.

Форум ташкилотчиси: Камбағалликни қисқартириш ва бандликка кўмаклашиш вазирлигининг ижтимоий буюртмаси доирасида Тошкент шаҳар “Шароит плус” ногиронлар жамоат бирлашмаси.