“Tolibon” harakati Tahor va Bag‘lon viloyatlarida Ramazon hayiti vaqtida ayollarning sayr qilishini taqiqlash haqida buyruq berdi. Bu haqda Hasht-e Subh Daily xabar berdi.
Ma’lum qilinishicha, “Tolibon” haj va xayr-ehsonlar rahbariyati imom va voizlarga maktub yo‘llab, hayitda va’z qilishda Haybatulloh Oxundzoda (“Tolibon” yetakchisi) nomidan foydalanishni buyurgan. Maktublarda “Tolibon” yetakchisining tabriknomasi ham hayit namozi xutbasiga qo‘shimcha sifatida o‘qilishi lozimligi qayd etilgan.
Shuningdek, odamlarga hayit kunlarida motam uchun marhumlar uylariga borishdan ham tiyilish kerakligi aytilgan.
“Odamlarga tuxum urish, tovuq urish kabi noqonuniy o‘yinlardan voz kechish tavsiya etilsin”, — deyiladi buyruqda.
“Tolibon” ayollarning ijtimoiy hayotiga cheklov qo‘yishi yangilik emas. Bungacha afg‘onistonlik ayollarning BMT idoralarida ishlashi, erkaklarga ayollar uchun kiyim tikish, ayollarning erkak shifokorlarga borishi, to‘yxonalar faoliyati, ayollarning universitet va maktabda ta’lim olishi, ayollarning shifoxonaga yolg‘iz borishi va ularning istirohat bog‘iga tashrif buyurishi taqiqlagan.
Izoh (0)