“Tolibon” harakati to‘yxonalar faoliyatini taqiqladi

“Tolibon” harakati Afg‘onistonning Samangan viloyatidagi to‘yxonalar faoliyatini taqiqladi. Bu haqda Etilaatroz xabar berdi.

Ma’lum qilinishicha, “Tolibon” fohishabozlikning oldini olish va “islom shariati”ga rioya qilish sababli bir necha zallarni yopib qo‘ygan.

Oybak shahridagi Qasr Almas, Qasr Riyoz va Qasr Sulton yopilgan uchta to‘yxona hisoblanadi. To‘yxona egalari “Tolibon” harakatini tanqid qilmoqda. Ulardan biri “Tolibon”ning qarori ishsizlikning ortishiga olib kelishi, investorlarning mamlakatda ishlashga bo‘lgan qiziqishini so‘ndirishini aytgan.

To‘yxonadagi xodimlarning bir qismi mamlakatda qashshoqlik va ishsizlik ortib borayotganidan xavotirda va “Tolibon”ning bu qarorini qayta ko‘rib chiqishini istamoqda.

Eslatib o‘tamiz, Afg‘onistonning Taxor viloyatidagi maktabda “Tolibon” o‘z jangchisining nikoh marosimini o‘tkazgandi. Marosim “Sayed Husayn Shahid” maktabida bo‘lib o‘tgan va unda faqat erkaklar qatnashgan. To‘y ishtirokchilari maktab binosida ovqatlangan. “Tolibon” hech kimga surat yoki video olishga ruxsat bermagan.