Rossiya rasmiylari Yevropaning kamida 11 ta shahridagi elchixonalarining tomlariga signallarni ushlab turish va telefon suhbatlarini tinglash uchun antennalar o‘rnatgan. Bu haqda tegishli surishtiruvni olib borgan VSQUARE jurnalistlar guruhi xabar berdi.
Bunday tizimlar “Zenit” kod nomini olgan, ular Budapesht, Stokgolm va Bryusselda topilgan. Foydalanilgan antennalarning ba’zilari nazoratchi, uchuvchi, politsiya va dengizchilarning suhbatlarini tinglash imkonini bergan.
Bunday antennalar deyarli har qanday aloqani — radioto‘lqinlardan tortib mobil telefonlardagi suhbatlarga qadar ushlab turadi va hatto GSM aloqasi orqali qo‘ng‘iroqlarni tinglash imkonini beradi.
Shuningdek, Rossiya har bir xorijiy diplomatik vakolatxonasiga maxfiy razvedka topshiriqlarini oladigan bir yoki ikkita maxsus agent tayinlangani aytilmoqda. Ba’zi hollarda, hatto diplomatlarning o‘zlari ham maxfiy aloqa haqida bilmaydi.
G‘arb razvedkasining sobiq yuqori martabali xodimlardan biri Rossiyaning Varshavadagi elchixonasi tomida rus razvedka xizmatlariga shahardagi deyarli barcha xabarlarni tinglash imkonini beradigan butun bir “elektron razvedka uyasi” borligini tushuntirdi.
Jurnalistlar Rossiya elchixonasi joylashgan Varshavadagi eski binoning tomiga o‘rnatilgan bunday qurilmalar aks etgan videoni e’lon qildi.
Kichik antennalar va katta konteyner
Polsha harbiy kontrrazvedkasi sobiq rahbari general Pyotr Pitel katta konteyner atrofida o‘rnatilgan bir qator kichik antennalarga alohida e’tibor qaratdi.
“Bir qarashda hamma narsa puxta o‘ylangan elektron razvedka postiga o‘xshab ko‘rinadi, u katta ehtimol bilan mahalliy razvedkaning radioaloqa, telefon suhbatlari va hokazolar kabi elektromagnit nurlanishni tutib olish uchun ishlatiladi. Xuddi shunday razvedka uskunalari butun dunyo bo‘ylab ruslar o‘zlarining josuslik operatsiyalarini ta’minlash maqsadida foydalanadi”, — deya tushuntirdi general.
Stratpoints Foundation eksperti, polkovnik Masey Matisyakning so‘zlariga ko‘ra, bu konteynerlar butun dunyo bo‘ylab Rossiya diplomatiyasi tomonidan qo‘llanilayotgan binolar ustida joylashgan.
“Bu yerda biz juda ko‘p sun’iy yo‘ldosh antennalarini ko‘rmoqdamiz, bundan tashqari, juda ko‘p qiziqarli narsalarni va uchta konteynerni ko‘rish mumkin”, — deb tushuntirdi u.
Mutaxassisning fikricha, bunday qurilmalar Rossiya rezidensiyasi faoliyat yuritayotgan mamlakatlarda tinglash uchun texnik razvedka maqsadida foydalaniladi.
“Konteynerlar razvedka operatsiyalari, masalan, agentlar bilan uchrashuvlar va aloqa uchun texnik yordam sifatida ishlatilishi mumkin”, — dedi Matisyak.
Izoh (0)