Россия расмийлари Европанинг камида 11 та шаҳридаги элчихоналарининг томларига сигналларни ушлаб туриш ва телефон суҳбатларини тинглаш учун антенналар ўрнатган. Бу ҳақда тегишли суриштирувни олиб борган VSQUARE журналистлар гуруҳи хабар берди.
Бундай тизимлар “Зенит” код номини олган, улар Будапешт, Стокгольм ва Брюсселда топилган. Фойдаланилган антенналарнинг баъзилари назоратчи, учувчи, полиция ва денгизчиларнинг суҳбатларини тинглаш имконини берган.
Бундай антенналар деярли ҳар қандай алоқани — радиотўлқинлардан тортиб мобил телефонлардаги суҳбатларга қадар ушлаб туради ва ҳатто GSМ алоқаси орқали қўнғироқларни тинглаш имконини беради.
Шунингдек, Россия ҳар бир хорижий дипломатик ваколатхонасига махфий разведка топшириқларини оладиган бир ёки иккита махсус агент тайинлангани айтилмоқда. Баъзи ҳолларда, ҳатто дипломатларнинг ўзлари ҳам махфий алоқа ҳақида билмайди.
Ғарб разведкасининг собиқ юқори мартабали ходимлардан бири Россиянинг Варшавадаги элчихонаси томида рус разведка хизматларига шаҳардаги деярли барча хабарларни тинглаш имконини берадиган бутун бир “электрон разведка уяси” борлигини тушунтирди.
Журналистлар Россия элчихонаси жойлашган Варшавадаги эски бинонинг томига ўрнатилган бундай қурилмалар акс этган видеони эълон қилди.
Кичик антенналар ва катта контейнер
Польша ҳарбий контрразведкаси собиқ раҳбари генерал Пётр Пител катта контейнер атрофида ўрнатилган бир қатор кичик антенналарга алоҳида эътибор қаратди.
“Бир қарашда ҳамма нарса пухта ўйланган электрон разведка постига ўхшаб кўринади, у катта эҳтимол билан маҳаллий разведканинг радиоалоқа, телефон суҳбатлари ва ҳоказолар каби электромагнит нурланишни тутиб олиш учун ишлатилади. Худди шундай разведка ускуналари бутун дунё бўйлаб руслар ўзларининг жосуслик операцияларини таъминлаш мақсадида фойдаланади”, — дея тушунтирди генерал.
Stratpoints Foundation эксперти, полковник Масей Матисякнинг сўзларига кўра, бу контейнерлар бутун дунё бўйлаб Россия дипломатияси томонидан қўлланилаётган бинолар устида жойлашган.
“Бу ерда биз жуда кўп сунъий йўлдош антенналарини кўрмоқдамиз, бундан ташқари, жуда кўп қизиқарли нарсаларни ва учта контейнерни кўриш мумкин”, — деб тушунтирди у.
Мутахассиснинг фикрича, бундай қурилмалар Россия резиденсияси фаолият юритаётган мамлакатларда тинглаш учун техник разведка мақсадида фойдаланилади.
“Контейнерлар разведка операциялари, масалан, агентлар билан учрашувлар ва алоқа учун техник ёрдам сифатида ишлатилиши мумкин”, — деди Матисяк.
Изоҳ (0)