Toshkent viloyatida fuqarolarga zo‘rlik ishlatib, qo‘rqitish orqali ularni tunab kelgan jinoiy guruh ushlandi. Bu haqda Tergov departamenti axborot xizmati xabar berdi.
Xabarga ko‘ra, 10-aprel kuni soat taxminan 20:00 larda, 26 yoshli A.A., 25 yoshli R.A. va 24 yoshli E.S.lar o‘zganing mulkini talon-toroj qilish maqsadida, oldindan o‘zaro jinoiy til biriktirib bir guruhga birlashgan. Ular Chirchiq shahar “Sharq” mahallasi hududidan o‘tgan Bo‘zsuv kanali oldida 30 yoshli X.X.ga zo‘rlik ishlatgan.
Shundan so‘ng uning yonida bo‘lgan 2 million so‘mlik telefon, 250 000 so‘mlik bir dona nikoh uzugi va 270 000 so‘mlik bir dona kumushdan ishlangan erkaklar uzugini talonchilik yo‘li bilan qo‘lga kiritib, hodisa sodir bo‘lgan joydan yashiringan.
Bundan tashqari, yuqoridagi shaxslar o‘zlarining jinoiy qilmishlarini davom ettirib, shu kuni soat taxminan 22:00 larda, Qibray tuman “Turkiston” mahallasi hududida 33 yoshli D.Z.ni zo‘rlik ishlatish bilan qo‘rqitgan. Ushbu shaxs tanasining yuz va qorin qismiga urib tan jarohati yetkazib, unga tegishli bo‘lgan 2 million so‘m naqd pullarni, 1 million 800 ming so‘mlik telefon va 12 million 200 ming so‘mlik erkaklar kumush hamda tilla taqinchoqlarini ochiqdan ochiq talon-toroj qilib, hodisa joyidan yashiringan.
Mazkur holat yuzasidan Qibray tumani IIB huzuridagi Tergov bo‘limi tomonidan A.A., R.A. va E.S.larga nisbatan Jinoyat kodeksning 166-moddasi 3-qismi “a” bandi (talonchilik) bilan jinoyat ishi qo‘zg‘atilib, barcha gumon qilinuvchilarga nisbatan qamoqqa olish tarzidagi ehtiyot chorasi qo‘llanilgan.
Hozirda, ushbu shaxslarning boshqa jinoyatlarga aloqadorligi tekshirilmoqda. Tergov davom etmoqda.
Izoh (0)