Тошкент вилоятида фуқароларга зўрлик ишлатиб, қўрқитиш орқали уларни тунаб келган жиноий гуруҳ ушланди. Бу ҳақда Тергов департаменти ахборот хизмати хабар берди.
Хабарга кўра, 10 апрель куни соат тахминан 20:00 ларда, 26 ёшли А.А., 25 ёшли Р.А. ва 24 ёшли Э.С.лар ўзганинг мулкини талон-торож қилиш мақсадида, олдиндан ўзаро жиноий тил бириктириб бир гуруҳга бирлашган. Улар Чирчиқ шаҳар “Шарқ” маҳалласи ҳудудидан ўтган Бўзсув канали олдида 30 ёшли Х.Х.га зўрлик ишлатган.
Шундан сўнг унинг ёнида бўлган 2 миллион сўмлик телефон, 250 000 сўмлик бир дона никоҳ узуги ва 270 000 сўмлик бир дона кумушдан ишланган эркаклар узугини талончилик йўли билан қўлга киритиб, ҳодиса содир бўлган жойдан яширинган.
Бундан ташқари, юқоридаги шахслар ўзларининг жиноий қилмишларини давом эттириб, шу куни соат тахминан 22:00 ларда, Қибрай туман “Туркистон” маҳалласи ҳудудида 33 ёшли Д.З.ни зўрлик ишлатиш билан қўрқитган. Ушбу шахс танасининг юз ва қорин қисмига уриб тан жароҳати етказиб, унга тегишли бўлган 2 миллион сўм нақд пулларни, 1 миллион 800 минг сўмлик телефон ва 12 миллион 200 минг сўмлик эркаклар кумуш ҳамда тилла тақинчоқларини очиқдан очиқ талон-торож қилиб, ҳодиса жойидан яширинган.
Мазкур ҳолат юзасидан Қибрай тумани ИИБ ҳузуридаги Тергов бўлими томонидан А.А., Р.А. ва Э.С.ларга нисбатан Жиноят кодекснинг 166-моддаси 3-қисми “а” банди (талончилик) билан жиноят иши қўзғатилиб, барча гумон қилинувчиларга нисбатан қамоққа олиш тарзидаги эҳтиёт чораси қўлланилган.
Ҳозирда, ушбу шахсларнинг бошқа жиноятларга алоқадорлиги текширилмоқда. Тергов давом этмоқда.
Изоҳ (0)