Buxoro viloyati Shofirkon tumanida fuqarodan tahdid orqali 10 ming dollar talab qilgan shaxs ushlandi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, Shofirkon tumani “Jo‘yrabod” mahallasida yashovchi, 1991-yilda tug‘ilgan F.S. o‘zganing mol-mulkini tovlamachilik yo‘li bilan talon-toroj qilish maqsadida tanishi, Jondor tumani Namgoni qishlog‘ida yashovchi, 1981-yillda tug‘ilgan fuqaroni qo‘rqitgan. U sir saqlanishi lozim bo‘lgan maʼlumotlarni oshkor qilish bilan tahdid qilgan.
Buxoro viloyati Ichki ishlar boshqarmasi jinoyat qidiruv bo‘limi xodimlari tomonidan o‘tkazilgan tezkor tadbir davomida Buxoro shahar “Sheyxon” mahallasi hududida joylashgan “Karvon” buyum bozoriga qarashli avtomashinalar turargohida u tovlamachilik yo‘li bilan talab qilgan 10 000 dollardan 3000 dollarni olgan vaqtida jinoyat ustida qo‘lga olingan.
Mazkur holat yuzasidan Buxoro shahar IIO FMB tomonidan Jinoyat kodeksining 165-moddasi 2-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Izoh (0)