O‘zbekistonda xizmat ko‘rsatgan jurnalist, O‘zbekiston Yozuvchilar uyushmasi aʼzosi Murod Xidir 17-aprel kuni 84 yoshida vafot etdi. Bu haqda uyushma matbuot xizmati xabar berdi.
Murod Xidir 1939-yilda Qashqadaryo viloyati Kitob tumani Olaqo‘yliq qishlog‘ida tug‘ilgan. 1962-yilda Samarqand davlat universitetining filologiya fakultetini tamomlagan. U “Qashqadaryo haqiqati” va “Kelajak tongi” gazetalaridagi publitsistik maqolalari bilan elga tanilgan. “Guliston”, “Sharq yulduzi” va “Sanʼat” jurnallarida ham faoliyat yuritgan. “Sirli olam” jurnali, “Qalb ko‘zgusi” va “Sohibqiron yulduzi” gazetalarida bosh muharrirlik vazifasini bajargan.
Shuningdek, O‘zbekiston Yozuvchilar uyushmasida turli lavozimlarda ishlagan. Murod Xidir “Qirg‘oqlar”, “Amu sohillar bo‘ylab”, “Ko‘zacha va bo‘tacha”, “Toshko‘l”, “Kiyikcha va bo‘ynoq”, “Harf o‘yini” kabi kitoblar muallifi sanaladi.
Aprel boshlarida O‘zbekiston televideniyesining taniqli jurnalisti Sohibjon Alijonov 55 yoshida, 2022-yil 17-yanvar kuni O‘zbekistonda xizmat ko‘rsatgan jurnalist, “Mehnat shuhrati” ordeni sohibi Dilbar Mahmudova 85 yoshida, O‘zbekistonda xizmat ko‘rsatgan jurnalist Rustam Obidov esa 72 yoshida Qariyalar uyida vafot etgandi.
Izoh (0)