Қашқадарё вилояти ИИБ тезкор-қидирув хизмати ходимлари томонидан банк карталаридаги маблағларни ўзлаштирган банк ходими аниқланди. Бу ҳақда ИИВ ахборот хизмати хабар берди.
Қайд этилишича, “Халқ банки” Ғузор тумани бошқарувчиси ИИБ бошлиғига ариза ёзиб, номаълум шахслар томонидан банк кассирига тегишли дастурдаги шахсий логин ва парол орқали бошқа фуқаронинг телефон рақамини киритган ҳолда 3 нафар мижознинг пул маблағлари ечиб олинганини билдирган.
Дастлабки тергов ҳаракатлари ва техник ишланмалар натижасида ушбу жиноий ҳаракатни банк филиали бошқарувчисининг ҳайдовчиси содир этгани маълум бўлган. Ҳайдовчи кассирнинг логин ва паролларини билиб олган ва банк мониторинг хонасидаги компьютер орқали тизимга кириб, кўплаб фуқароларга тегишли 50 миллион сўмдан ортиқ маблағларни ўзлаштирган.
Ҳолат юзасидан Жиноят кодексининг 169-модда (Ўғирлик) 3-қисми билан жиноят иши қўзғатилган.
Февраль ўрталарида Наманганда мижозларнинг пластик карталаридан 440 миллион сўм ечиб олган банк ходими қўлга олингани тўғрисида хабар берилганди. Январда бўлса, Бухорода корхона раҳбари банк собиқ масъуллари билан тил бириктириб 1,3 млрд сўм кредит пулларни ўзлаштиргани маълум бўлган эди.
Изоҳ (0)