Navoiy viloyatida xorijda ishlab chiqarilgan qariyb 2,5 ming quti aksiz markasiz tamaki mahsulotlari to‘xtatib qolindi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holat Bosh prokuratura huzuridagi departamentning Navoiy viloyat boshqarmasi tomonidan “Oqtosh” YPX maskanida Bojxona boshqarmasi xodimlari bilan hamkorlikda o‘tkazilgan tezkor tadbirda aniqlangan.
Vodiy-Xorazm yo‘nalishida harakatlanib kelayotgan Isuzuʼda fuqaro J.A. tegishli hujjatlari bo‘lmagan, xorijda ishlab chiqarilgan 2440 quti aksiz markasiz tamaki mahsulotlarini Hazorasp tumanida o‘tkazish maqsadida olib kelayotgani aniqlanib, ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)