Andijon davlat tibbiyot instituti muassasaga xorijlik talabalarni jalb qilish maqsadida Hindiston bo‘yicha uchta vakolatli ofisini ochdi. Bu haqda “Daryo”ga institut axborot xizmati xabar bermoqda.
Taʼkidlanishicha, prezident Shavkat Mirziyoyevning 29-mart kuni turizm salohiyatini jadal rivojlantirish yuzasidan o‘tkazgan videoselektor yig‘ilishi berilgan topshiriqlar ijrosini taʼminlash maqsadida Andijon viloyati hokimligi delegatsiyasi Hindistonga borgan.
Xizmat safari davomida Andijon davlat tibbiyot instituti rektori Madamin Madazimov Dehli va Balarampur shaharlarida joylashgan institutning uchta vakolatli ofislari ochilishida ishtirok etib, masʼul shaxslarga ishonch sertifikatlarini topshirgan.
“Ayni paytda institutimizda 502 nafar xorijlik talaba tahsil olishmoqda. Eʼtiborli jihati ularning 298 nafari hind talabalar. Bundan ko‘rinib turibdiki, hindistonlik yoshlarning respublikamizdagi tibbiyot muassasalariga bo‘lgan qiziqishi ortib bormoqda.
Mana shularni hisobga olib, hamkorlarimiz bilan kelishgan holda Hindiston bo‘yicha vakolatli ofislarni ochishga qaror qildik. Bundan maqsad tibbiyot sohasiga qiziqadigan yoshlarni institutimizga to‘g‘ridan to‘g‘ri jalb etishdan iborat. Bugungi ochilish marosimidan so‘ng 50ga yaqin hindistonlik yoshlar bilan muloqot o‘tkazib, taʼlim jarayonlari, yaratilgan sharoitlar haqida maʼlumot berdik. Ularning aksariyati kelgusi o‘quv yilidan bizdan tahsil olish maqsadida ekanliklarini bildirishdi”,— deydi Madamin Madazimov.
Institut axborot xizmati xodimi Oyjamol Rahmonovaning qo‘shimcha qilishicha, safar davomida hindistonlik mutaxassislarni ADTI klinikasiga jalb qilish, jigar, buyrak va yurak transplantologiya sohasi bo‘yicha murakkab jarrohlik amaliyotlarini viloyatning o‘zida yo‘lga qo‘yish, shuningdek, O‘zbekistondagi dorivor o‘simliklarni birgalikda o‘rganish, ushbu yo‘nalish bo‘yicha qo‘shma taʼlim dasturlarini ishga tushirish bo‘yicha ham Ayush xalq tabobati vazirligi bilan hamkorlik memorandumlari imzolangan.
Izoh (0)