Farg‘ona viloyati O‘zbekiston tumani hokimligida ishlovchi shaxs pora olayotgan vaqtda ushlandi. Bu haqda Ichki ishlar vazirligi axborot xizmati xabar berdi.
Ma’lum bo‘lishicha, mutasaddi shaxs hokimiyat balansida bo‘lgan qishloq xo‘jaligi maqsadlari uchun mo‘ljallangan zaxira yerlarni sotishga urinayotgani to‘g‘risida ma’lumot olingan.
12-aprel kuni Farg‘ona viloyati IIB TQX va Iqtisodiy jinoyatlarga qarshi kurashish departamentining viloyat boshqarmasi xodimlari bilan hamkorlikda tezkor-qidiruv tadbiri o‘tkazilgan.
Yer nazorati inspektori hokimiyat balansida bo‘lgan qishloq xo‘jaligi maqsadlari uchun mo‘ljallangan zaxira yerlardan 3 gektarini ochiq elektron platformasi orqali yutib berish evaziga tadbirga jalb etilgan maxsus xaridordan 4 ming dollar miqdoridagi pullarni olayotgan vaqtida qo‘lga olinib, tegishli tartibda hujjatlar rasmiylashtirilgan.
To‘plangan hujjatlarga asosan, Iqtisodiy jinoyatlarga qarshi kurashish departamentining Farg‘ona viloyat boshqarmasi tomonidan Jinoyat kodeksining 168-moddasi (firibgarlik) 3-qismi “a” bandi va 25-modda (jinoyatga tayyorgarlik ko‘rish va jinoyat sodir etishga suiqasd qilish) orqali 211-moddasi (pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)