Eron hukumati jamoat joylarida hijob o‘ramagan ayollarni aniqlash uchun kameralar o‘rnatishni boshladi. Bu haqda BBC xabar berdi.
Politsiyaga ko‘ra, sochlari ro‘mol bilan yopilmagan ayollar “ogohlantiruvchi matnli xabarlar” oladi. Hukumat bu usul hijob qonuniga qarshi chiqishlarning oldini olishga yordam berishiga ishonmoqda. Eronda hijobga qarshi namoyishlarga 2022-yili hijob qoidalarini buzganlikda ayblanib hibsga olingan yosh kurd ayol Mahsa Aminiyning politsiya hibsxonasida o‘lgani sabab bo‘lgandi.
Aminiyning vafotidan keyin hibsga olinish xavfi borligiga qaramay, yirik shaharlarda ro‘molini yechgan ayollar soni ortgan. Politsiya yangi tizim “hijob qonunini buzuvchilarga hujjatlar va ogohlantirish xabarlarini” aniqlash va yuborish uchun “aqlli” kameralar va boshqa vositalardan foydalanishni o‘z ichiga olishini aytmoqda.
Eronda ayollar qonun bo‘yicha sochlarini hijob (ro‘mol) bilan o‘rashi shart. Qonunni buzgan ayollar jarimaga tortiladi yoki hibsga olinadi. Eron prezidenti Ibrohim Raisi 2-aprel kuni eronlik ayollar “diniy zarurat” sifatida hijobda bo‘lishi kerakligini yana bir bor ta’kidlagan.
Bayonot Eronda do‘konga hijobsiz kirgan ikki ayolning erkak tomonidan hujumga uchragani sababli e’lon qilingan.
Rasmiylardan hujumga uchragan ikki ayolni hibsga olish buyurilgan. Raisiy hijob qonuniy masala ekani va unga rioya qilish kerakligini aytib, bunga munosabat bildirgan.
Izoh (0)