Eronning Kurdiston viloyatidagi Miraj qizlar maktabi o‘quvchilari kimyoviy gazdan zaharlandi. Bu haqda Anadolu agentligi xabar berdi.
Kamida 47 nafar o‘quvchi qiz jabrlangan, ulardan 20 nafarining ahvoli og‘ir. Eron rasmiylari voqea yuzasidan hozircha izoh bermadi.
Gazdan zaharlangan qizlarning ota-onalari norozlik sifatida maktab devoridagi Eron bayrog‘ini olib tashlagan va oliy rahnamo Ali Xomanaiyga qarshi shiorlar aytgan. Guvohlarning so‘zlariga ko‘ra, maktab yaqinida huquq-tartibot kuchlari bilan to‘qnashuv yuz bergan.
Eronda qizlar ommaviy zaharlanmoqda
Eronda so‘nggi paytlarda mamlakat bo‘ylab o‘quvchi qizlarning zaharlanishi holatlari keskin oshgan. Bu harakatlar qizlarning maktabga borishiga to‘sqinlik qilishga urinish, deb baholanmoqda. Eron hukumati qizlarning zaharlanishiga aloqador 110 kishini hibsga oldi.
The Guardian o‘z manbalariga tayanib, qizlar kuzda hukumatga qarshi bo‘lib o‘tgan namoyishlarda qatnashgani va faol siyosiy pozitsiyasi uchun zaharlanganini yozdi.
Zaharlanish holatlarini davolashga ixtisoslashgan shifokor mavjud dalillarni hisobga olgan holda, “bu zaharlanishning eng ko‘p ehtimoliy sababi kuchsiz fosfororganik modda bo‘lishi mumkin”ligini aytgan. Uning so‘zlariga ko‘ra, zaharlanish sababi “mamlakat ichidagi va tashqarisidagi ekstremistik guruhlar yordamida namoyishchilarni qo‘rqitish” istagi bo‘lgan. “Ular yaqinda bo‘lib o‘tgan norozilik namoyishlarida faol ishtirok etgan o‘quvchi qizlardan o‘ch olmoqchi”, — deb tushuntirdi shifokor.
Eron prezidenti Ibrohim Raisiy yuzlab o‘quvchi qizlarning zaharlanishida Tehron dushmanlarini aybladi.
Izoh (0)