Yaponiya bosh vaziri Fumio Kisidaning Vakayama shahridagi Saygasaki baliqchilik portida nutq so‘zlagan sahna yaqinida kuchli portlash ovozi eshitildi, deb xabar bermoqda NHK. Hukumat rahbari voqea joyidan zudlik bilan evakuatsiya qilingan, jabrlanganlar yo‘q. Kisidaning o‘ziga ham hech qanday zarar yetmagan.
Asahi telekanalining aniqlik kiritishicha, huquq-tartibot idoralari gumonlanuvchini voqea joyida hibsga olgan, portlashdan bir daqiqa o‘tib havoga oq tutun ko‘tarila boshlagan. Hodisa guvohlarining so‘zlariga ko‘ra, yaqin atrofdagi guruch maydoniga silindr shaklidagi kumushrang buyum uloqtirilgan, shundan so‘ng portlash sodir bo‘lgan va tutun ko‘tarilgan.
Portlash Kisida o‘z nutqini tugatgandan keyin yuz bergan. Hodisadan keyin uni mashinada olib ketishgan. Politsiya voqea yuzasidan tergov boshladi.
2022-yil 8-iyul kuni Yaponiyaning sobiq bosh vaziri Sindzo Abe Nara shahrida Liberal-demokratik partiyani qo‘llab-quvvatlab nutq so‘zlayotgan paytida unga suiqasd qilishgandi. Yaponiya o‘zini o‘zi himoya qilish kuchlarining sobiq dengizchisi, 42 yoshli Tetsuya Yamagami unga ikki marta o‘q uzgan, Abe ko‘krak va bo‘ynidan yaralangan. U zudlik bilan shifoxonaga yetkazilgan, biroq hayotini saqlab qolishning iloji bo‘lmagan. Yamagami qotillikda aybini tan olgan. Abe 2006—2007 va 2012—2020-yillarda Yaponiya bosh vaziri bo‘lgan edi.
Izoh (0)