Rossiya tashqi ishlar vaziri Sergey Lavrov mamlakat Qozog‘iston va O‘zbekiston uch tomonlama gaz ittifoqi loyihasini muhokama qilishda oldinga siljigani, bu har bir tomon uchun foyda ekanini aytdi. Bu haqda ‘RIA Novosti” xabar berdi.
“Uch davlat – Rossiya, O‘zbekiston va Qozog‘iston, jumladan, prezidentlar darajasida energiya xavfsizligini to‘liq mustahkamlashga xizmat qiladigan ushbu keng ko‘lamli loyihani muhokama qilishda faol olg‘a siljidi.
Bundan hammaga foyda bo‘ladi, gaz yetkazib beruvchilar bor ekan, gazga qiziquvchilar ham bor. Tomonlar ham tranzit, ham narx shartlari bo‘yicha kelishib olsa, bundan qanoatlansa, hamma yutadi”, — dedi Lavrov O‘zbekistonga tashrifi yakunlari bo‘yicha matbuot anjumanida.
“Uch tomonlama gaz ittifoqi”
Rossiya prezidenti Vladimir Putin va Qozog‘iston prezidenti Qosim-Jo‘mart To‘qayev noyabr oxirida Kremlda bo‘lib o‘tgan uchrashuvda Rossiya gazini Qozog‘iston va O‘zbekiston hududi orqali tashish bo‘yicha harakatlarni muvofiqlashtirish uchun O‘zbekiston ishtirokida “uch tomonlama gaz ittifoqi”ni yaratish masalasini muhokama qilgandi.
“‘Uch tomonlama ittifoq’ g‘oyasi birinchi bosqichda, ehtimol, ma’lum bir yuridik shaxs bilan muvofiqlashtirish mexanizmini yaratish imkoniyatini nazarda tutadi, ammo bunday masalalar hali ham muhokama qilinishi kerak, — deb tushuntirgan Peskov.
“Rossiya, Qozog‘iston va O‘zbekiston gaz sohasida, jumladan, gaz yetkazib berish va uni qayta ishlash sohasida hamkorlik qilish uchun katta salohiyatga ega”, — degan Rossiya Bosh vaziri o‘rinbosari Aleksandr Novak.
18-yanvar kuni esa “Gazprom” Qozog‘iston bilan 24-yanvar kuni O‘zbekiston bilan gaz sohasida hamkorlik bo‘yicha yo‘l xaritasi imzolagan.
O‘z navbatida, O‘zbekiston energetika vaziri Jo‘rabek Mirzamahmudov dekabr oyida O‘zbekiston qo‘shni davlatlardan gaz va elektr energiyasini qandaydir alyans yoki ittifoq orqali emas, balki tijorat shartnomalari asosida import qilish niyatida ekanini aytgandi.
Izoh (0)