Germaniya va Xitoy tashqi ishlar vazirlari inson huquqlari masalasi bo‘yicha o‘tkazilgan uchrashuvda kelishuvga erisha olmadi. Bu haqda Deutsche Presse-Agentur xabar berdi.
Germaniya tashqi ishlar vaziri Annalena Berbok xitoylik hamkasbi Tsin Ganga BMT nizomi va konvensiyasini eslatib o‘tdi. Bunga javoban Gan “Xitoy G‘arbdan o‘qituvchiga muhtoj emas”ligini qayd etdi.
“Xitoy unga inson huquqlari bo‘yicha leksiya o‘qishlarini istamaydi. Inson huquqlari haqida gap ketganda, ’dunyoda yagona standartlar yo‘q”, — dedi Xitoy diplomati.
U Berbokning Xitoydagi inson huquqlariga oid tanqidini rad etib, har bir davlatning o‘ziga xos sharoiti, madaniy va tarixiy kelib chiqishi borligini aytdi. Berbok dunyoda inson huquqlari bo‘yicha “umumiy standartlar” mavjudligini aytib, xitoylik hamkasbiga BMT nizomini eslatdi.
Uning so‘zlariga ko‘ra, nizomda BMTning barcha a’zolarini hurmat qilish talab etiladigan “universal” inson huquqlari mavjud. Berbok Xitoyda fuqarolik jamiyati va inson huquqlari uchun maydon cheklanganidan xavotir bildirgan.
Xitoy tashqi ishlar vaziri Shinjonda musulmon uyg‘urlar ta’qib qilinayotgani haqidagi da’volarga javoban, bu inson huquqlari muammosi emasligi, balki radikalizm va separatizmga qarshi kurash ekanini aytdi. U hozircha Shinjondagi vaziyat “barqaror”ligi, odamlar “juda baxtli hayot”da yashayotganini ta’kidladi.
“Xitoyning dunyodagi yuksalishini ushlab turish uchun Shinjon masalasidan foydalanayotgan Xitoyga qarshi kuchlar bor. Ular Shinjondagi vaziyatni ham izdan chiqarmoqchi. Xorijiy kuchlar hududdan uzoqda turishi kerak”, — degan Qin Gang.
Izoh (0)