Nara shahrida Yaponiya sobiq bosh vaziri Sindzo Abega suiqasd uyushtirildi, unga qarata o‘q uzildi, siyosatchi ayni paytda kasalxonada, deb yozadi “RBK” Yaponiya OAVlariga tayanib.
Abe mamlakat markaziy qismida joylashgan Nara shahrida nutq so‘zlagan, NHK telekanali muxbiri ikkita o‘q ovoziga o‘xshagan tovushlarni eshitgan, shundan keyin 11:30 da (Toshkent vaqti bilan 7:30) siyosatchi hushini yo‘qotgan. Sobiq bosh vazir kasalxonaga yotqizilgan, hujum qilgan shaxs, 41 yoshli mahalliy fuqaro qo‘lga olingan. Nikkei yozishicha, sochma o‘q otadigan ov miltig‘i (drobovik)dan Abening bel qismiga o‘q uzgan.
NHK politsiya ma’lumotlariga tayanib xabar berishicha, sobiq bosh vazirning yuragi to‘xtab qolgan, u vertolyotda kasalxonaga olib borilgan. Hukumatdagi mansabdorlardan biriga ko‘ra, Abe og‘ir ahvolda.
Abe Narada parlament yuqori palatasiga saylov kampaniyasi doirasida avval o‘zi rahbarlik qilgan Liberal-demokratik partiyani qo‘llab-quvvatlab nutq so‘zlagan. Hozir ushbu partiyaga hukumatning joriy rahbari Fumio Kisida raislik qiladi.
Abe bosh vazir lavozimida 2006-yildan 2007-yilgacha va 2012-yildan 2020-yilgacha ishlagan, mamlakatning butun tarixida ushbu mansabni eng uzoq vaqt davomida egallab turgan. 2020-yilda salomatligi bilan bog‘liq muammolar tufayli bosh vazirlikdan ketgan.
Siyosatchi 67 yoshda. Uning onasi tomonidan bobosi Yaponiya bosh vaziri bo‘lgan, otasi esa mamlakat tashqi ishlar vaziri bo‘lib ishlagan. Abe siyosiy karyerasini 1982-yilda otasiga kotiblik qilish bilan boshlagan.
Mavzuga doir:
- Yaponiya sobiq bosh vaziri Sindzo Abe budjet mablag‘larini talon-toroj qilishda gumonlandi
- Yaponiya sobiq bosh vaziri Sindzo Abe hokimiyatdaligi vaqtida uyushtirilgan bazmlar ishi bo‘yicha so‘roq qilinadi
- Tramp Sindzo Abeni Yaponiya tarixidagi buyuk bosh vazir deb atadi
- Sindzo Abe Yaponiya Ikkinchi jahon urushi dahshatlari yana bir bor qaytarilishiga yo‘l qo‘ymasligini aytdi
Izoh (0)