Хитой Германияни инсон ҳуқуқлари бўйича “маъруза ўқимасликка” чақирди

Германия ва Хитой ташқи ишлар вазирлари инсон ҳуқуқлари масаласи бўйича ўтказилган учрашувда келишувга эриша олмади. Бу ҳақда  Deutsche Presse-Agentur хабар берди.

Германия ташқи ишлар вазири Анналена Бербок хитойлик ҳамкасби Цин Ганга БМТ низоми ва конвенциясини эслатиб ўтди. Бунга жавобан Ган “Хитой Ғарбдан ўқитувчига муҳтож эмас”лигини қайд этди.

“Хитой унга инсон ҳуқуқлари бўйича лексия ўқишларини истамайди. Инсон ҳуқуқлари ҳақида гап кетганда, дунёда ягона стандартлар йўқ”, — деди Хитой дипломати.

У Бербокнинг Хитойдаги инсон ҳуқуқларига оид танқидини рад этиб, ҳар бир давлатнинг ўзига хос шароити, маданий ва тарихий келиб чиқиши борлигини айтди. Бербок дунёда инсон ҳуқуқлари бўйича “умумий стандартлар” мавжудлигини айтиб, хитойлик ҳамкасбига БМТ низомини эслатди.

Унинг сўзларига кўра, низомда БМТнинг барча аъзоларини ҳурмат қилиш талаб этиладиган “универсал” инсон ҳуқуқлари мавжуд. Бербок Хитойда фуқаролик жамияти ва инсон ҳуқуқлари учун майдон чекланганидан хавотир билдирган.

Хитой ташқи ишлар вазири Шинжонда мусулмон уйғурлар таъқиб қилинаётгани ҳақидаги даъволарга жавобан, бу инсон ҳуқуқлари муаммоси эмаслиги, балки радикализм ва сепаратизмга қарши кураш эканини айтди. У ҳозирча Шинжондаги вазият “барқарор”лиги, одамлар “жуда бахтли ҳаёт”да яшаётганини таъкидлади. 

“Хитойнинг дунёдаги юксалишини ушлаб туриш учун Шинжон масаласидан фойдаланаётган Хитойга қарши кучлар бор. Улар Шинжондаги вазиятни ҳам издан чиқармоқчи. Хорижий кучлар ҳудуддан узоқда туриши керак”, — деган Қин Ганг.