Kanada Shinjondagi 10 ming uyg‘ur musulmoniga boshpana bermoqchi
Kanada parlamenti Xitoyning Shinjon hududidan ikki yil ichida Kanadaga 10 ming uyg‘ur qochqinni joylashtirish bo‘yicha taklifni ma’qulladi. Bu haqda Reuters xabar berdi.
Liberal deputat Samir Zuberi tomonidan ishlab chiqilgan qonun loyihasi Kanada hukumatini unga rioya qilishga majburlamaydi. Zuberining qonun loyihasiga 322 kishi ovoz bergan, siyosatchi Kanada hukumatini uchinchi davlatlarga qochgan uyg‘urlar va boshqa etnik turkiy musulmonlar Xitoydan “bosim”ga duch kelayotganini tan olishga chaqirgan.
Biroq, Bosh vazir Jastin Tryudo hukumati parlamentning bir ovozdan qo‘llab-quvvatlaganini hisobga olib, chora ko‘rishi kerak bo‘ladi.
“Kanada har doim himoyaga muhtojlarga yordam berish uchun o‘z hissasini qo‘shadi. Men parlament tomonidan qabul qilingan taklifda ko‘rsatilgan chora-tadbirlarni ilgari surish uchun barcha partiya a’zolari bilan ishlashga qat’iy qaror qildim”, — dedi Immigrasiya vaziri Shon Freyzer bayonotida.
2021-yilda Kanada Xitoydagi “uyg‘ur genotsidi” bo‘yicha o‘z pozitsiyasini bildirgan birinchi davlatlardan biri bo‘ldi. 2022-yilda esa Kanada Xitoyning Shinjondagi musulmonlarga nisbatan inson huquqlarini poymol etayotgani haqida BMTda munozara o‘tkazishga uringan davlatlar qatoriga kirdi.
