Xitoy Ukrainaga qarshi urushda Rossiyaga yordam berish uchun qurol-yarog‘ yetkazib berishga rozi bo‘lgan. Bu haqda The Washington Post xabar berdi.
Ma’lum qilinishicha, mazkur ma’lumot Pentagonning internetga sizdirilgan maxfiy hujjatlarida keltirib o‘tilgan. Pekin yakuniy qarorni 2023-yil boshida qabul qilgan. Ushbu yordamni fuqarolik buyumlari sifatida yashirin yetkazib berish rejalashtirilgani aytilmoqda. Qurol-yarog‘ ta’minoti bosqichma-bosqich amalga oshirilishi kerak bo‘lgan.
“Xitoy bu ma’lumotni oshkor qilishni istamagan, hamma narsani sir saqlashni xohlagan”, — deyiladi xabarda.
Biroq AQSHda Xitoydan Rossiyaga o‘limga olib keluvchi qurollarning to‘g‘ridan to‘g‘ri yetkazib berilishi tasdiqlanmagan.
“Biz Xitoyning Rossiyaga qurol yetkazgani bo‘yicha yordam ko‘rsatgani haqida dalillarni ko‘rmadik. Lekin xavotirda qolamiz va buni diqqat bilan kuzatishda davom etamiz”, — dedi AQSH ma’muriyatining yuqori martabali rasmiysi.
AQSH bu ma’lumotni Rossiya tashqi razvedka xizmatining suhbatlarini eshitish orqali qo‘lga kiritishga muvaffaq bo‘lgan.
O‘z navbatida, Xitoy Rossiya–Ukraina urushida ko‘proq tinchlikparvar rolni ilgari suradi, chunki qurolli mojaroga shunchaki barham berish foydali bo‘ladi.
“Agar AQSH va NATO qurollaridan sezilarli darajada foydalangan holda Moskvaga hujum bo‘lsa, Xitoy Rossiyani qurol bilan ta’minlash uchun sabab topadi”, — deyiladi xabarda.
Izoh (0)