Indoneziyada to‘rt nafar O‘zbekiston fuqarosi ijtimoiy tarmoqlarda terror tashviqotini tarqatganlikda ayblanib, qo‘lga olingandi. Ularning uch nafari qo‘riqchini o‘ldirib, tergov izolyatoridan qochib ketdi. Bu haqda Jakarta Globe xabar berdi.
Politsiya ma’lumotiga ko‘ra, terrorchilikda gumonlangan o‘zbekistonliklar immigratsiya xizmati xodimini o‘ldirib, Shimoliy Jakartadagi tergov izolyatoridan qochib ketgan. Keyinroq ulardan biri Sunter daryosidan o‘lik holda topilgan, yana ikki nafari esa alohida joylarda aniqlanib, hibsga olingan.
Hodisa 10-aprel kuni mahalliy vaqt bilan soat 4:00 atrofida sodir bo‘lgan. Shimoliy Jakarta immigratsiya idorasi hibsxonasining amaldorlari va qo‘riqchilari saharlikka tayyorlanayotgan payti yuz bergan.
“O‘zbekiston fuqarolari immigratsiya xizmati xodimi Adi Vidodoni o‘ldirish uchun oshxona pichoqlaridan foydalangan va yana uch nafar izolyator xodimi og‘ir yaralangan. Tong otishidan sal oldin tergov izolyatorida saqlanayotgan uch xorijlik qochishga urinib, immigratsiya xizmati xodimlari va 88-otryad zobitlariga hujum qildi”, — deydi Milliy politsiya aksilterror otryadi vakili Asvin Siregar.
Hujum qilganlar 26 dan 40 yoshgacha bo‘lgan to‘rt nafar O‘zbekiston fuqarosi bo‘lgan.
“Ulardan uch nafari qochishga muvaffaq bo‘ldi, qolgan biri esa qochishdan bosh tortdi”, — dedi Asvin.
Hujumdan ko‘p o‘tmay qidiruv operatsiyasida gumondorlardan biri Bukit Gading Indah turar joy majmuasi bog‘ida qo‘lga olingan, ikkinchi gumonlanuvchi esa Sunter daryosi yaqinidagi xandaq ichida yashirinib yurganida aniqlandi.
“Yana bir gumondor Sunter daryosidan o‘lik holda topildi. U daryoga sakragan, biroq cho‘kib ketgan. Uning jasadi Kramat Jati kasalxonasiga olib ketilgan”, — dedi Asvin.
Aniqlanishicha, tergov izolyatoridan qochish rejasini gumonlanuvchilar O‘zbekistonning Jakartadagi konsulligi xodimlari kelganidan keyin amalga oshirgan.
“Ular o‘z mamlakatlaridagi qattiq jazodan qo‘rqib, deportatsiya bo‘lishni xohlamagan”, — deyiladi xabarda.
Hozirda tirik qolgan uch gumondorga nisbatan qotillik bo‘yicha tergov jarayoni boshlangan.
Izoh (0)