Хитой Украинага қарши урушда Россияга ёрдам бериш учун қурол-яроғ етказиб беришга рози бўлган. Бу ҳақда The Washington Post хабар берди.
Маълум қилинишича, мазкур маълумот Пентагоннинг интернетга сиздирилган махфий ҳужжатларида келтириб ўтилган. Пекин якуний қарорни 2023 йил бошида қабул қилган. Ушбу ёрдамни фуқаролик буюмлари сифатида яширин етказиб бериш режалаштирилгани айтилмоқда. Қурол-яроғ таъминоти босқичма-босқич амалга оширилиши керак бўлган.
“Хитой бу маълумотни ошкор қилишни истамаган, ҳамма нарсани сир сақлашни хоҳлаган”, — дейилади хабарда.
Бироқ АҚШда Хитойдан Россияга ўлимга олиб келувчи қуролларнинг тўғридан тўғри етказиб берилиши тасдиқланмаган.
“Биз Хитойнинг Россияга қурол етказгани бўйича ёрдам кўрсатгани ҳақида далилларни кўрмадик. Лекин хавотирда қоламиз ва буни диққат билан кузатишда давом этамиз”, — деди АҚШ маъмуриятининг юқори мартабали расмийси.
АҚШ бу маълумотни Россия ташқи разведка хизматининг суҳбатларини эшитиш орқали қўлга киритишга муваффақ бўлган.
Ўз навбатида, Хитой Россия–Украина урушида кўпроқ тинчликпарвар ролни илгари суради, чунки қуролли можарога шунчаки барҳам бериш фойдали бўлади.
“Агар АҚШ ва НАТО қуролларидан сезиларли даражада фойдаланган ҳолда Москвага ҳужум бўлса, Хитой Россияни қурол билан таъминлаш учун сабаб топади”, — дейилади хабарда.
Изоҳ (0)