“Zo‘ravonlik o‘z nomi bilan endi jinoyat”. Shahnoza Soatova ayollar va voyaga yetmaganlarni zo‘ravonlikdan himoya qilishga qaratilgan qonun imzolangani haqida

O‘zbekistonda ayollar va voyaga yetmaganlarni zo‘ravonlikdan himoya qilishni ta’minlashga qaratilgan qonun imzolangandi. Bloger Shahnoza Soatova ushbu qonun to‘g‘risida fikrlarini bildirdi.

Uning ta‘kidlashicha, qonunning qabul qilinishi tarixiy hodisa hisoblanadi. Ong o‘zgarsa, vaziyat o‘zgaradi. Bugun jamiyatda kuzatilayotgan zo‘ravonlik holatlarining asl ildizi ham aslida shunda, deb baholaydi bloger.

“Nazarimda, ushbu qonunning qabul qilinishi tarixiy bir hodisa. Umuman qonun loyihasining bir yil davomida bosib o‘tgan yo‘lining o‘zi alohida bir tarix. Mana shu tarixga ozmi-ko‘pmi guvoh bo‘lgan, daxldor bo‘lgan inson sifatida aytamanki, bu qonunning jamiyatga yetkazayotgan o‘zgacha bir yangi mujdasi bor. Ya’ni endi zo‘ravonlikka avvalgidek toqat qilib bo‘lmaydi. 

Begonaning begonaga qilayotgan zo‘ravonligini biz jinoyat deb hisoblar ekanmiz, oilada to‘rt devor ichida yaqinlarining, kuchlilarning ojizlariga qilayotgan zo‘ravonligiga negadir toqatlimiz. Mana shu holatni o‘zgartirish kerak. Ong o‘zgarsa, vaziyat o‘zgaradi. Bugun jamiyatimizda kuzatilayotgan zo‘ravonlik holatlarining asl ildizi ham aslida shunda.

Biz oilada qilinayotgan zo‘ravonlikka juda ham toqatlimiz. Ushbu qonun oilaviy zo‘ravonlikni kriminallashtirar ekan jamoatchilikka shunday bir mujdani yo‘llayaptiki, endi bunday holatlarga chidab bo‘lmaydi. Endi vaziyat o‘zgarishi kerak. Zo‘ravonlik o‘z nomi bilan endi jinoyat. Ayniqsa u oilada sodir etilsa, buning jazosi yanayam og‘irroq bo‘lishi kerakligini jamiyatga yetkazmoqda. Men qonun loyihasini ishlab chiqishda faol ishtirok etgan barchani, xususan, jamoatchilik faollarini ushbu g‘alaba bilan tabriklayman”, — deydi Shahnoza Soatova.

Eslatib o‘tamiz, 11-aprel kuni Prezident administratsiyasi sho‘ba mudiri Saida Mirziyoyeva O‘zbekistonda ayollar va voyaga yetmaganlarni zo‘ravonlikdan himoya qilishni ta’minlashga qaratilgan qonun imzolanganini e’lon qilgandi. Mutasaddi barcha davlat organlari, fuqarolik jamiyatlari, faollar va media — barcha-barchani bu jarayonga qo‘shilib, zo‘ravonlikka qarshi kurashning yagona mexanizmiga aylanishga chaqirgan.