O‘zbekistonning uch viloyati: Namangan, Andijon, Toshkentda gaz va elektrdan noqonuniy foydalanganlar 350 million so‘mdan ortiq zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, departamentning Namangan va Andijon tuman bo‘limlari tomonidan ETK xodimlari bilan hamkorlikda o‘tkazilgan tekshiruvlarda, “B.F.” MCHJ va “N.k” oilaviy korxonasi rahbarlari ishlab chiqarish binosi hamda savdo do‘koni elektr hisoblash uskunalariga tashqaridan taʼsir o‘tkazib, jami 166,8 million so‘mlik elektr energiyasidan noqonuniy foydalangani aniqlangan.
Shu kabi, departamentning Chinoz tumani bo‘limi tomonidan IIB xodimlari bilan hamkorlikda o‘tkazilgan tezkor tadbirlarda, fuqaro F.X. va K.B. o‘zlariga tegishli issiqxona binolarini umumiy foydalanishdagi gaz quvuriga yashirincha ulab olishib, jami 186,5 million so‘mlik tabiiy gazdan noqonuniy foydalangani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) va 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)