Namanganda soxta raqam bilan harakatlangan Malibu avtomashinasi aniqlandi. Bu haqda “Daryo” muxbiri Azizbek Abduvaliyev xabar bermoqda.
Viloyat YHXB matbuot xizmatining bildirishicha, viloyat hududida nomaʼlum shaxsga tegishli bo‘lgan, qora rangli Malibu rusumli avtotransport vositasi 01 072 AAA belgili soxta davlat raqamini o‘rnatib olgan holda harakatlanib yurgani to‘g‘risida olingan maʼlumotga asosan tezkor qidiruv harakatlari olib borildi.
Qidiruv ishlari davomida mazkur transport vositasi joriy yil 22-mart kunining o‘zida Angren va Namangan shaharlarida ikki marta maʼmuriy huquqbuzarlik sodir etganligi aniqlangan. Shuningdek, mazkur davlat raqam belgisi bilan aslida masʼuliyati cheklangan jamiyatlardan birining tasarrufidagi Hyundai SantaFe rusumli avtomobil ro‘yxatdan o‘tkazilgani va raqam hozirda ushbu avtomobilga qadalgani maʼlum bo‘lgan.
.jpg?_t)
Soxta avtoraqam bilan harakatlangan Malibu egasi Namangan shahrida yashovchi, 1994-yilda tug‘ilgan fuqaro bo‘lib chiqdi. Avtomobilning asl davlat raqami belgisi esa 01 A 215 AA bo‘lgan.
Malibu haydovchisi soxta avtoraqamni Rossiyaga ishlash uchun ketgan tanishiga buyurtma berib, Moskva shahrida 30 AQSH dollariga yasatganligi va bir necha marta o‘zining avtomobiliga qadab foydalanganligi haqida ko‘rsatma bergan.
Yuqoridagi hamda avtomashina hujjatlarini qalbakilashtirish bilan bog‘liq holatlarga huquqiy baho berish maqsadida jinoyat ishi qo‘zg‘atilib, tergov harakatlari olib borilmoqda. Malibu esa jarima maydoniga joylashtirildi.
Izoh (0)