Ўзбекистон Олий таълим, фан ва инновациялар вазирлиги, “‘Навоий’ Maxсус иқтисодий зона дирекцияси” вакиллари ва Малайзиянинг учувчисиз бошқариладиган аппаратларни (дронлар) ишлаб чиқаришга ихтисослашган бир қатор етакчи компаниялари ўртасида онлайн учрашувлар ташкил этилди. Бу ҳақда “Дунё” агентлиги хабар берди.
Қайд этилишича, мазкур тадбирлар чоғида Ўзбекистонда қишлоқ хўжалиги ва саноат соҳаларида фойдаланиш учун дронлар ишлаб чиқариш тизимини йўлга қўйиш бўйича ҳамкорлик масалалари муҳокама қилинган.
Шунингдек, Малайзия компаниялари томонидан ишлаб чиқариладиган дронлар тўғрисида маълумот тақдим этилган. Хусусан, хориж томони қишлоқ хўжалиги учун мўлжалланган AGRI серияларидаги дастурий таъминот билан интеграциялашган пуркагич дронлари, Octocopter серияли курер дронлари ва UGV-Unmanned Ground Vehicle каби дронларнинг техник кўрсаткичлари бўйича тақдимот ўтказган.
Ушбу мамлакатнинг Alphaswift, Meraque ва Aoniс компаниялари Ўзбекистонда дронлар ишлаб чиқариш лойиҳасини амалга ошириш истиқболларини ўрганиб чиқишга қизиқиш билдирган.
Алпҳасwифт компаниясининг асосий фаолият тури қишлоқ хўжалиги ва етказиб берувчи дронларни ишлаб чиқариш, уларни модификациялашга ихтисослашган.
2018 йилда ташкил топган Meraque компанияси кенг турдаги дронлар ва улар учун дастурий таъминот ишлаб чиқариш, робототехникага ихтисослашган. Компания Вьетнам, Камбоджа, Филиппин, Лаос ва Покистонда фаолият юритади. Мазкур компания Малайзияда 2022 йилнинг энг инновацион технологияси танловида 2-ўринни қўлга киритган.
Aoniс компанияси эса Хитойнинг жаҳондаги энг йирик дрон ишлаб чиқарувчи DJI компаниясининг Жануби-Шарқий Осиёдаги расмий дистрибютори ҳисобланади. Aoniс томонидан қишлоқ хўжалиги ва саноат сохасида кенг турдаги дрон хизматлари кўрсатилади.
Учрашувлар натижасида ҳамкорликда Ўзбекистонда дронлар ишлаб чиқариш инвестиция лойиҳасини амалга оширишнинг ҳуқуқий асос ва имкониятларини ўрганиш, лойиҳаларнинг техник параметрларини ишлаб чиқиш бўйича келишувга эришилган.
2017 йил июлда Шавкат Мирзиёев Тошкент вилоятидаги қишлоқ хўжалиги ер майдонларини мониторингдан ўтказиш ишларининг тақдимоти билан танишганди. Ўшанда президентга қишлоқ хўжалигида дрон Ан-2 самолётидан афзал экани кўрсатиб берилган. Шундан кейин давлат раҳбари учувчисиз парвоз қилувчи замонавий қурилмалар — дронлар қишлоқ хўжалигида муҳим аҳамиятга эга эканини айтиб, уларни ишлаб чиқаришни ўзлаштиришга эътибор қаратиш лозимлигини таъкидлаган эди.
“Ўзбекистон Республикасида учувчисиз учадиган аппаратлардан фойдаланишни тартибга солиш бўйича қўшимча чора-тадбирлар тўғрисида”ги Вазирлар Маҳкамаси қарорига кўра, республика ҳудудида учувчисиз учадиган аппаратлар, уларнинг бутловчи ва эҳтиёт қисмларининг белгиланган тартибда мажбурий декларация қилинадиган транзитидан ташқари қонунга хилоф равишда олиб кириш, сотиш, сотиб олиш, сақлаш ёки улардан фойдаланиш тақиқланади.
Изоҳ (0)