Shavkat Mirziyoyev 12-aprel kuni kechasi Turkiya prezidenti Rajab Toyyib Erdog‘on bilan o‘tkazgan telefon orqali muloqotda Togg brendi ostida ishlab chiqarilgan birinchi turk elektromobili uchun minnatdorlik bildirdi. Bu haqda Prezident matbuot xizmati xabar berdi.
Xabarga ko‘ra, davlat rahbari qardosh Turkiya prezidenti va xalqini katta texnologik g‘alaba – mamlakatda zamonaviy elektromobillarni sanoat usulida ishlab chiqarish boshlangani bilan tabrikladi. Suhbat chog‘ida O‘zbekiston-Turkiya strategik sheriklik va ko‘p qirrali hamkorlik munosabatlarining bugungi darajasiga yuksak baho berildi.
O‘zbekiston va Turkiya yetakchi kompaniyalarining yuqori texnologik tarmoqlardagi sanoat kooperatsiyasi miqyosini yanada kengaytirish uchun mavjud imkoniyatlar qayd etildi. Joriy yilda o‘tkazilishi rejalashtirilgan ikki tomonlama Oliy darajadagi Strategik sheriklik kengashi yig‘ilishiga puxta tayyorgarlik ko‘rishga alohida eʼtibor qaratildi.
Shuningdek, mintaqaviy ahamiyatga molik dolzarb masalalar yuzasidan ham fikr almashildi. Telefon muloqoti yakunida Rajab Toyyib Erdog‘on O‘zbekiston Konstitutsiyasiga o‘zgartirishlar kiritish bo‘yicha bo‘lajak referendumni to‘liq qo‘llab-quvvatlashini bildirdi va uning muvaffaqiyatli o‘tishini tiladi.
Shavkat Mirziyoyev Turkiya prezidenti tomonidan sovg‘a qilingan Togg brendi ostidagi elektromobil ruliga o‘tirib, uni haydab ko‘rgan edi.
Izoh (0)