O‘zbekistonda 10-apreldan “Toza havo” oyligi tadbiri boshlandi, deb xabar beradi Tabiat resurslari vazirligi.
Ichki ishlar, Sog‘liqni saqlash, Tabiat resurslari vazirliklari bilan birgalikda o‘tkaziladigan tadbirdan maqsad mamlakatda avtotransportlar tashlamalarini kamaytirishdir.
Ta’kidlanishicha, so‘nggi yillarda ishlab chiqarish korxonalari, avtomobillar sonining ko‘payishi atmosferaga chiqarilayotgan tashlamalar miqdorining sezilarli ortishiga sabab bo‘lmoqda. Bu esa o‘z navbatida respublikada, ayniqsa, Toshkent shahrida havoning ifloslanish darajasi oshishiga xizmat qilyapti.
2022-yil yakuniga ko‘ra, havo ifloslanishi bo‘yicha xalqaro havo indeksi reytingida Toshkent shahri 20-o‘rinni egallagan.
Maʼlumot uchun, bugungi kunda O‘zbekistonda 4 millionga yaqin avtotransport vositalari mavjud bo‘lib, shundan 100 mingtasi nosoz hisoblanadi. Ulardan atmosferaga bir yilda o‘rtacha 1,3 million tonna zararli tashlamalar tashlanadi, bu umumiy tashlamalarning 63 foizini tashkil etadi (ushbu ko‘rsatkich Toshkent shahrida 88 foizga teng).
Transport vositalari sonining kundan-kunga ortishi natijasida tashlamalar miqdori oldingi yilga nisbatan 2022-yilda 26 ming tonnaga ko‘paygan. Bunga foydalaniladigan yoqilg‘i turining sifati, aholining jamoat transportlaridan yetarli darajada foydalanmasdan, o‘z avtotransport vositalarida yurishlari, avtoulov egalarining o‘z avtotransportlarining texnik sozligiga yetarli darajada eʼtibor qaratmasliklarini asosiy sabablar sifatida keltirish mumkin.
Tadbir davomida respublikaning barcha hududlaridagi yo‘l-patrul maskanlarida, viloyat, tuman (shahar)larning markaziy ko‘chalarida benzin, dizel, tabiiy siqilgan va suyultirilgan gazda harakatlanadigan avtotransport vositalarining atmosfera havosiga tashlanayotgan zararli gazlar miqdori maxsus asbob-uskunalar orqali ko‘rikdan o‘tkaziladi.
Qayd etilishicha, tadbir doirasida 79 ta yo‘l-patrul maskanlarida ko‘rik nuqtalari, shuningdek, viloyat va shaharlar markaziy ko‘chalarida ko‘chma postlar tashkil etilib, ularga 500 nafar xodim jalb etiladi. Tadbir 10-maygacha davom etadi.
AQSHning Havo sifati indeks platformasi reytingi Toshkent shahrining 2022-yil 17-oktabr soat 15:27 holatiga ko‘ra, dunyodagi havosi eng iflos (166 birlik) shahar deya xabar bergandi. O‘sha kuni soat 20:00 holatiga ko‘ra esa poytaxtdagi havoning sifat darajasi 166 birlikdan 262 birlikkacha ortgan va xalqaro o‘lchovda bunday havo juda nosog‘lom va ko‘pchilikning salomatligi uchun juda xavfli ekani keltirilgan.
Izoh (0)